पुरु लम्सालको नाटक संग्रह ‘निऋति’ बजारमा

काठमाडौं । नेपाली रङ्गमञ्चमा लामो समयदेखि सक्रिय नाटककार, निर्देशक तथा अभिनेता पुरु लम्साल को नयाँ नाटक संग्रह ‘निऋति’ बजारमा आएको छ। समकालीन नेपाली नाट्य क्षेत्रमा सक्रिय भूमिका खेल्दै आएका लम्सालको यो कृति पछिल्लो समय रङ्गकर्मी तथा साहित्यप्रेमीबीच चासोको विषय बनेको छ।

नेपाल संगीत तथा नाट्य प्रज्ञा प्रतिष्ठान का प्राज्ञ सभा सदस्यसमेत रहेका लम्साल ‘नेपाली रङ्गमञ्चमा नेपाली नाटक’ भन्ने अभियानका अगुवा अभियन्ता हुन्। उनले विदेशी नाटकको प्रभाव घटाउँदै नेपाली माटो, परिवेश र मौलिकतामा आधारित नाटक लेखन तथा मञ्चन हुनुपर्ने धारणा अघि सार्दै आएका छन्।

पुस्तकको भूमिकामा रामचन्द्र पोखरेल ले लम्सालको नाट्ययात्रालाई नेपाली नाटकको ऐतिहासिक विकासक्रमसँग जोडेर विश्लेषण गरेका छन्। उनका अनुसार नेपाली नाटकमा बालकृष्ण सम पछि अशेष मल्ल जस्तै प्रभावशाली हस्ती देखिएझैँ अहिलेको पुस्तामा पुरु लम्साललाई त्यसकै निरन्तरताका रूपमा लिन सकिन्छ।

डा. पोखरेलले लम्सालको लेखन, निर्देशन र अभिनय तीनै क्षेत्रमा निरन्तर योगदानलाई उच्च मूल्यांकन गर्दै उनलाई ‘बालकृष्ण समको नाती पुस्ताका नाटककार’का रूपमा चित्रण गरेका छन्।

नेपाली मौलिकता र रङ्गमञ्चीय अभियान बुझ्न चाहने पाठक तथा रङ्गकर्मीहरूका लागि शिखा बुक्स द्वारा प्रकाशित यो संग्रह महत्वपूर्ण कृतिका रूपमा रहने अपेक्षा गरिएको छ। संग्रहमा पाँचवटा फरक–फरक स्वादका नाटक समावेश छन् भने पुस्तकको मूल्य ४९५ रुपैयाँ तोकिएको छ।