तरुण दलको कार्यक्रमलाई लिएर फैलाइएको भ्रमपूर्ण प्रचारप्रति आपत्ति

नुवाकोट । नेपाल तरुण दल नुवाकोट क्षेत्र नं. १ ले आफ्नो नियमित संगठनात्मक कार्यक्रमलाई लिएर सामाजिक सञ्जालमा फैलाइएको भ्रमपूर्ण प्रचारप्रति गम्भीर ध्यानाकर्षण भएको जनाएको छ।

नेपाल तरुण दल नुवाकोट क्षेत्र नं. १ का सभापति शरण घलेको सभापतित्व तथा क्षेत्रीय कोषाध्यक्ष दिनेश थापाको संयोजकत्वमा २०८२ फागुन ९ गते आयोजना गरिएको कार्यक्रममा सहभागी तरुण कार्यकर्ताहरूका लागि सामान्य खानाको व्यवस्था गरिएको थियो। उक्त व्यवस्थालाई लिएर नेपाली काँग्रेसका उम्मेदवार डा. प्रकाशशरण महतसँग जोडेर गरिएको प्रचार तथ्यहीन र भ्रामक रहेको तरुण दलले स्पष्ट पारेको छ।

संयोजक दिनेश थापाका अनुसार, कार्यक्रम नेपाल तरुण दलका वार्षिक संगठनात्मक गतिविधिअन्तर्गत सञ्चालन गरिएको हो। “पार्टीमा आवद्ध तरुण साथीहरूलाई नेपाली काँग्रेसका विभिन्न गतिविधिमा सक्रिय गराउने उद्देश्यले यस्ता कार्यक्रम नियमित रूपमा आयोजना गरिँदै आएको छ,” उनले बताए।

तरुण दलले निर्वाचन आचारसंहिता विपरीत सर्वसाधारण वा मतदातालाई प्रभावित पार्ने कुनै गतिविधि नगरिएको र भविष्यमा पनि नगरिने स्पष्ट गरेको छ। साथै, अनावश्यक रूपमा राजनीतिक भ्रम सिर्जना गर्ने प्रयास नगर्न सम्बन्धित पक्षलाई आग्रह गरेको छ।
कार्यक्रमबारे फैलाइएको प्रचारप्रति खेद व्यक्त गर्दै तरुण दलले जनताको अन्तिम निर्णयलाई सम्मान गर्ने प्रतिबद्धता समेत दोहोर्‍याएको छ।