‘जारी २’ को प्रदर्शन मिति अनिश्चितकालका लागि स्थगित

काठमाडौं । बहुप्रतिक्षित फिल्म ‘जारी २’ को प्रदर्शन मिति स्थगित गरिएको छ। आउँदो असोज ३ गते रिलिज गर्ने तयारीमा रहेको यो फिल्म अब तोकिएको मितिमा दर्शकमाझ आउने छैन।

निर्माण कम्पनी बाँसुरी फिल्मस्ले विज्ञप्ति जारी गर्दै हाल देशभर जारी जेन–जी आन्दोलन र त्यसपछि सिर्जित असहज परिस्थितिका कारण सबैखाले मनोरञ्जनात्मक गतिविधि अनिश्चितकालका लागि स्थगित गरिएको जनाएको छ। यसै कारण फिल्मको ट्रेलर रिलिजसमेत अन्तिम समयमा रोकिनु परेको कम्पनीले जनाएको छ।

उपेन्द्र सुब्बा निर्देशित र लेखन गरेको ‘जारी २’ चर्चित हिट फिल्म ‘जारी’ को सिक्वेल हो। यसमा दयाहाङ राई, मिरुना मगर र विजय बराल मुख्य भूमिकामा छन्।

जेन–जी आन्दोलनका कारण देशभरका केही हलहरूमा क्षति पुगेको छ भने आइतबारसम्म कुनै पनि सिनेमाहल सञ्चालनमा आउन सकेका छैनन्। हल कहिले खोल्ने भन्ने विषयमा नेपाल चलचित्र संघले छलफल गरिरहेको छ।