गणतन्त्रको रक्षा गर्न आ-आफ्नो तर्फबाट पहल गरौँ : देउवा

काठमाडौ । नेपाली कांग्रेसका सभापति शेरबहादुर देउवाले नेपाली जनताको त्याग, बलिदान र उत्सर्गबाट प्राप्त ऐतिहासिक उपलब्धिको रक्षार्थ सबैले आ–आफ्नो तहबाट जिम्मेवारी निर्वाह गर्नुपर्ने बताएका छन्। 

गणतन्त्र दिवसका अवसरमा शुभकामना दिँदै देउवाले लोकतन्त्रको स्थापना र पुन: स्थापनाका लागि जीवन उत्सर्ग गर्ने ज्ञात–अज्ञात सबै शहीदप्रति श्रद्धाञ्जली अर्पण गरेका छन्। 

उनले नेपालको संविधानको संरक्षण र संघीय लोकतान्त्रिक गणतन्त्रात्मक शासन व्यवस्थाको संस्थागत विकासबाट नै नेपाललाई सभ्य, सुखी र सम्पन्न राष्ट्रका रुपमा रूपान्तरण गर्न सकिने तर्क गरेका छन्।

 ‘मुलुकलाई आर्थिक समृद्धिको मार्गमा अग्रसर गराउँदै लोकतान्त्रिक संस्कार, संस्कृति, मूल्य र मान्यतामा आधारित समतामूलक समाजको निर्माण गर्न यो दिवसले सबैलाई प्रेरणा प्रदान गर्नेछ भन्ने विश्वास लिएको छु’, उनको सन्देशमा उल्लेख छ।