काठमाडौं । प्रधानमन्त्री केपी शर्मा ओलीका प्रेस सल्लाहकार सूर्य थापाले ‘ग्लोबल वाच एनाइसिस’को हवाला दिँदै प्रकाशित समाचारहरु गैरजिम्मेवारपूर्ण र बदनियताका साथ प्रकाशित भएको दाबी गरेका छन् ।
प्रधानमन्त्रीका प्रेस सल्लाहकार सूर्य थापाले प्रेसनोट मार्फत् उक्त समाचार तथ्यहीन भएको तर्क गरेका हुन् ।
प्रकाशित समाचारहरु गैरजिम्मेवारपूर्ण र बदनियताका साथ प्रकाशित भएको उनको दाबी छ । ‘ग्लोबल वाच एनालाइसिस’को हवाला दिएर केही नेपाली अनलाइनहरूले ‘प्रधानमन्त्री केपी शर्मा ओलीको स्वीस बैंकमा खाता भएको र ५.५ मिलियन अमेरिकी डलर जम्मा रहेको’ भन्दै गलत र चरित्र हत्या गर्ने गरी झुठा समाचार सम्प्रेषण गरेकोप्रति ध्यानाकर्षण भएको प्रेसनोटमा भनिएको छ ।
प्रेसनोटमा तथ्यहीन सामग्रीलाई आधार मानेर समाचार बनाई नेपाली जनतामा भ्रम छर्न र प्रधानमन्त्रीलाई बदनाम गराउन खोजिएकोमा भन्दै खेद प्रकट गरिएको छ । प्रेसनोटमा भनिएको छ– ‘राष्ट्रिय हितको रक्षा, सीमा अतिक्रमणविरूद्ध नयाँ नक्सा प्रकाशनको साहसिक कदम र सर्वसम्मतिद्वारा संविधान संशोधनजस्तो महत्वपूर्ण निर्णयमा सिंगो राष्ट्रलाई एकताबद्द गर्दै प्रधानमन्त्रीज्यूले राष्ट्रको नेतृत्व सम्हालिरहनु भएको निकै संवेदनशील बेलामा बदनाम गराउन यस किसिमले सुनियोजित षडयन्त्र गर्ने अनेकन् तत्वहरू सक्रिय रहेको प्रष्ट नै छ ।’
थापाले यस्ता कुनै पनि दुष्प्रचारको भ्रममा नपर्न र पत्रकारिताको न्यूनतम जवाफदेहिता, जिम्मेवारीबोध र सामाजिक मर्यादा एवं शिष्टाचारविपरित कार्यमा संलग्न व्यक्ति र संस्थाहरूमाथि कारवाहीको लागि सम्बन्धित निकायको ध्यानाकर्षण गराएका छन् ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
