काठमाडौं । नेपाल कम्युनिष्ट पार्टी (नेकपा) काे स्थायी कमिटी बैठक अाज बस्दैछ ।
प्रधानमन्त्री निवास बालुवाटारमा बिहान ११ बजेपछि बस्ने बैठकमा काेराेना महामारी, मिलेनियम च्यालेञ्ज कर्पोरेशन (एमसीसी), सरकार र पार्टीका काम लगायत विषयमा छलफल हुने बताइएको छ ।
एमसीसीलाई लिएर नेकपा भित्रै विवाद रहेको छ । यहि असार १६ गते भित्र एमसीसी पारित गर्नु पर्ने समय सीमा रहेको र अब असार १७ गते मात्रै संसद बैठक बस्ने परिवेशकाबिच हुन लागेको नेकपाको स्थायी समिति बैठकलाई महत्वका साथ लिइएको छ ।
गएको वैशाख २५ गतेका लागि तय भएको स्थायी समिति बैठक अध्यक्ष समेत रहेका प्रधानमन्त्री केपी शर्मा ओलीले अन्तिम समयमा स्थगित गरेका थिए ।
मंगलबारको बैठकमा पार्टीका अर्का अध्यक्ष पुष्पकमल दाहाल प्रचण्ड र नेता माधव नेपाल खेमामा ओली पक्षविरुद्ध कडा रुपमा प्रस्तुत हुने तयारीमा छन् ।
प्रचण्ड र नेपाल पक्षले सरकारको काम प्रभावकारी नभएको, जनताको अपेक्षा अनुसार काम गर्न नसकेको, कार्यकर्तामा निराशा बढेकोसहितका विषय बैठकमा उठाउने तयारी गरेको नेपाल पक्षका एक स्थायी कमिटि सदस्यले बताए ।
यस्तै बैठकमा पार्टी नियन्त्रण बाहिर गएर सरकार सञ्चालन गरेको विषय पनि उठाइने उनले बताए।
यस्तै बैठकमा एमसीसीमाथि बिस्तारित छलफल हुने जनाइएको छ । यो बैठकले एमसीसी पारित गर्ने–नगर्ने या तत्कालका लागि थाती राख्ने सम्बन्धमा महत्वपूर्ण छलफल गरी निर्णय लिने सम्भावना रहेको छ ।
नेकपाले एमसीसी बारे अध्ययन गरी परामर्श दिन गठन गरेको कार्यदलले अहिलेकै अवस्थामा पारित गर्न नहुने सुझाव दिएको थियो । नेता झलनाथ खनालसहितको कार्यदलको सुझाव तथा पार्टीका नेताहरुको यसबारेको धारणामा पनि छलफल हुने छ ।
एमसीसीका सम्बन्धमा नेकपाको यो बैठक निर्णायक बैठक हो ।
नेकपाको विधान अनुसार तीन महिनामा एक पटक स्थायी कमिटी बैठक बस्नुपर्छ। तर गत मंसिर २९ पछि स्थायी कमिटी बैठक बस्न सकेकाे छैन । चैतमा बस्नुपर्ने बैठक काेराेनाका कारण स्थगित गरिएकाे थियाे ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
