काठमाडौं । नेपाल धितोपत्र बोर्ड (सेबोन)ले धितोपत्र व्यवसायी (मर्चेन्ट बैंक) का लागि ‘अन्डरराइटिङ’ को सीमा बढाउने निर्णय गरेको छ। बैंक तथा बीमा कम्पनीका सहायक कम्पनीमार्फत हुने अन्डरराइटिङको अधिकतम सीमा वृद्धि गर्दै बोर्डले मर्चेन्ट बैंकरहरूको क्षमता विस्तार गरेको हो।
गत शुक्रबार बसेको बोर्ड सञ्चालक समितिको बैठकले मर्चेन्ट बैंकरहरूको अन्डरराइटिङ सीमा बढाउने निर्णय गरेको हो। नयाँ व्यवस्थाअनुसार, अब बैंक र बीमा क्षेत्रका माउ कम्पनी रहेका मर्चेन्ट बैंकरहरूले आफ्ना माउ कम्पनीको नेटवर्थ बराबर रकमको अन्डरराइटिङ गर्न सक्नेछन्। यसअघि, मर्चेन्ट बैंकरहरूले आफ्नो अन्तिम लेखापरीक्षण भएको नेटवर्थको तीन गुणासम्मको रकम बराबरको धितोपत्र मात्र अन्डरराइटिङ गर्न पाउने व्यवस्था थियो।
यो व्यवस्था बैंक तथा बीमा क्षेत्रका माउ कम्पनी भएका मर्चेन्ट बैंकरहरूका लागि मात्र लागू हुनेछ। अन्य मर्चेन्ट बैंकरहरूको हकमा भने पुरानै नियम लागू हुनेछ। २०७६ अघि मर्चेन्ट बैंकहरूले आफ्नो नेटवर्थको पाँच गुणासम्म अन्डरराइटिङ गर्न सक्ने व्यवस्था थियो। तर, तत्कालीन बोर्ड अध्यक्ष भिष्मराज ढुंगानाले उक्त सीमा घटाएर तीन गुणा पुर्याएका थिए।
हाल ८० भन्दा बढी कम्पनीहरू प्राथमिक शेयर निष्कासन (आईपीओ) को प्रक्रिया तयारीमा रहेका छन्। पछिल्लो समय मर्चेन्ट बैंकरहरू अन्डरराइटिङ सीमाका कारण समस्या झेल्दै आएका थिए। नयाँ अध्यक्ष आएसँगै बोर्डले धमाधम आईपीओ अनुमति दिइरहेकाले अन्डरराइटिङ क्षमतामा आएको सीमालाई हटाउँदै सीमा बढाएको हो। यस निर्णयले धितोपत्र बजारमा तरलता अभिवृद्धि गर्ने र आईपीओ निष्कासन प्रक्रियालाई सहज बनाउने विश्वास गरिएको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
