काठमाडौं । अमेरिकाले मिलिनियम च्यालेन्ज कर्पोरेसन (एमसीसी)को अनुदानमा नेपालमा संचालित कार्यक्रम अघि बढाउन अनुमति दिएको छ
अनुदान कार्यान्वयन गर्ने निकाय मिलिनियम च्यालेन्ज एकाउन्ट (एमसीए-नेपाल)ले आफ्नो वेबसाइट मार्फत खरिद कार्य र कार्यालय सञ्चालन सम्बन्धी कार्य गर्न एमसीसीबाट अनुमति प्राप्त भएको जानकारी दिएको हो ।
गत २० जनवरी सत्ता सम्हाल्ने बित्तिकै अमेरिकी राष्ट्रपति डोनाल्ड ट्रम्पले अमेरिकाले दिने सबै वैदेशिक सहायता रोकेको थिए । त्यसपछि एमसीसीले गत फागुन गते इमेलमार्फत एमसीसी परियोजना पनि ९० दिनका लागि स्थगित भएको जानकारी गराएको थियो ।
अहिले अमेरिकाले नेपाललाई दिने एमसीसी अनुदान निरन्तरता दिने/नदिने विषयमा यसको प्रभावबारे समीक्षा गरिरहेको छ । यसैबीच, अहिले रोकिएको काम अघि बढाउन एमसीसीबाट स्वीकृत आएको एमसीए नेपालले जानकारी दिएको छ ।
‘अमेरिकाको वैदेशिक सहायता सम्बन्धी समीक्षा चलिरहेकै बेला अमेरिकी सरकारले एमसीसी नेपाल कम्प्याक्ट अन्तर्गतका केही कार्य अगाडि बढाउन अनुमति प्रदान गरेको छ । यो अनुमतिले समीक्षाबाट निस्किने कुनै निश्चित परिणामप्रति कुनै संकेत भने गर्दैन,’ एमसीए नेपालले वेबसाइटमा उल्लेख गरेको छ ।
एमसीसीले खरिद कार्य र कार्यालय सञ्चालन सम्बन्धी कार्य गर्न अनुमति दिएको हो । यससँगै अब एमसीए नेपालले आवश्यक टेन्डर आह्वान र कार्यालय सञ्चालन सम्बन्धी काम गर्न सक्नेछ ।
‘अगाडि बढाउन अनुमति दिइएका कार्यहरूमा महत्वपूर्ण खरिद कार्य र कार्यालय सञ्चालन सम्बन्धी आवश्यक कार्य पर्छन् । एमसीए-नेपाल कामहरूको पुनः थालनीका लागि व्यवस्थापन गरिरहेको छ भने पारदर्शिताप्रति प्रतिबद्ध रहेको छ । एमसीए-नेपाल अमेरिकी सरकारको वैदेशिक सहायता सम्बन्धी समीक्षाबारे अद्यावधिक विवरणको प्रतीक्षा गर्दै आफूबाट हुनुपर्ने काम भएको सुनिश्चित गर्न नेपाल सरकार र मिलिनियम च्यालेन्ज कर्पोरेसनसँग निकटतापूर्वक समन्वय गरिरहेको छ,’ एमसीए नेपालले वेबसाइटमार्फत जारी गरेको विज्ञप्तिमा उल्लेख छ ।
शुक्रबार नै एमसीए नेपाललको बोर्ड बैठक समेत बसेको थियो । यद्यपि, त्यसको निर्णय भने सार्वजनिक भइसकेको छैन ।
एमसीसी अनुदानका लागि २९ भदौ ३०७४ मा द्धिपक्षीय सम्झौता भएको थियो भने २०८० भदौ २९ देखि कार्यान्वयनमा आएको थियो । एमसीसीको ५० करोड अमेरिकी डलर अनुदान र नेपाल सरकारको १९ करोड ५० लाख अमेरिकी डलर योगदानमा विद्युत् प्रसारण लाइन, सबस्टेसन र सडक सुधार आयोजना सञ्चालन हुँदै छन् ।
एमसीसी परियोजना अन्तर्गत ४०० केभीको डबल सर्किट ३१५ किलोमिटर विद्युत् प्रसारण लाइन र सडक अन्तर्गत दाङको भालुबाङदेखि बाँकेको शिवखोलासम्म ७७ किलोमिटर सडक स्तरोन्नति गरिने योजना छ ।
काठमाडौंको लप्सीफेदी र नुवाकोटको रातमाटेमा सबस्टेसन, मकवानपुर, धादिङ, तनहुँ, पाल्पा, चितवन, नवलपरासी हुँदै भारतको महेशपुरसम्म प्रसारण लाइन बनाइने छ । प्रसारण लाइन निर्माणपछि नेपाल भारतबीच ३ हजार मेगावाट बिजुली आदानप्रदान गर्न सकिने छ ।
योजना अन्तर्गत ३१५ किलोमिटर लामो प्रसारण लाइन अन्तर्गत १८ किमीको ठेक्का लागिसकेको छ भने २९७ किमीको लागि अहिले ग्लोबल टेन्डर आह्वान भई प्रक्रियामा छ । सबस्टेशनतर्फ तीन वटैको ठेक्का लागिसकेको छ ।
तनहुँको दमौलीमा ४०० केभी क्षमताको नयाँ दमौली सबस्टेशन निर्माणका लागि भारतको टेक्नो इलेक्ट्रिक एण्ड इञ्जिनियरिङ लिमिटेडसँग ३.८८ करोड अमेरिकी डलरमा ठेक्का पाएको छ ।
त्यस्तै, नुवाकोटको बेलकोटगढी नगरपालिका-७ रातमाटेमा ४०० केभी सबस्टेसन निर्माण गर्न भारतको टेक्नो इलेक्ट्रिक एण्ड इञ्जिनियरिङ कम्पनीले ठेक्का पाएको छ । यसको लागत ५ करोड १६ लाख अमेरिकी डलर छ । त्यसैगरी, नवलपरासी (बर्दघाट सुस्तापश्चिम) जिल्लामा ४०० केभी नयाँ बुटवल सबस्टेशन निर्माणको ठेक्का लिङ्कसन इण्डिया प्रालिले पाएको छ ।
एमसीसी ५ वर्षमा निर्माण सम्पन्न हुनैपर्ने, नभए अमेरिकी अनुदान फिर्ता जाने प्रकृतिको परियोजना हो । यो कार्यान्वयनमा आएको डेढ वर्ष बढी भइसकेको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
