काठमाडौं । राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले प्रधानमन्त्री केपी शर्मा ओलीलाई राजा सहितको प्रजातन्त्र स्वीकार्न चेतावनी दिएका छन्।
आइतबार त्रिभुवन अन्तर्राष्ट्रिय विमानस्थलमा पूर्वराजा ज्ञानेन्द्र शाहलाई स्वागत गरी निर्मल निवास पुर्याएपछि आयोजित जनसम्बोधनमा उनले प्रधानमन्त्री ओलीलाई कडा सन्देश दिएका हुन्। शाहीले प्रधानमन्त्रीलाई सम्बोधन गर्दै अब सुधार नगरे जनताले निर्णय गर्ने चेतावनी दिए। उनले भने, ‘प्रधानमन्त्रीज्यू, अब कि त सचिनुस् कि त सकिनुस्। नविन सम्झौतामा आउनुस्। राजा सहितको प्रजातन्त्रलाई स्वीकार गर्नुहोस्।’
शाहीले चार बुँदे माग अघि सार्दै नयाँ राजनीतिक सहमति गर्न आह्वान गरे। उनका अनुसार नेपालमा राजा सहितको प्रजातन्त्र पुनःस्थापना गर्नुपर्ने, जनताबाट प्रत्यक्ष निर्वाचित कार्यकारी प्रधानमन्त्रीको व्यवस्था गर्नुपर्ने, प्रदेश संरचना खारेज गर्नुपर्ने तथा नेपाललाई हिन्दु, बुद्ध, किराँत सहितको वैदिक सनातन हिन्दु राष्ट्र घोषणा गर्नुपर्ने माग छन्। उनले सरकारलाई यी माग पूरा गर्न चेतावनी दिँदै भने, ‘यदि यी माग पूरा भएनन् भने, जनताले सडकबाटै तपाईं र तपाईंको व्यवस्थालाई फालिदिनेछन्।’
उनको सम्बोधनका क्रममा उपस्थित समर्थकहरूले ‘राजा आउ, देश बचाउ’ नारासमेत लगाएका थिए। शाहीले वर्तमान व्यवस्था असफल भइसकेको दाबी गर्दै मुलुकलाई नयाँ राजनीतिक प्रणाली आवश्यक रहेको बताए। उनले राप्रपाले यी मुद्दालाई लिएर देशव्यापी जनजागरण अभियान सञ्चालन गर्ने योजना बनाइरहेको जानकारी दिए।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
