काठमाडौं । सेयर बजारमा उछाल आएको छ । बिहीबार हाफ सेन्चुरीको फड्को मारेको नेप्सेले आज ७५ अंकको छलाङ हानेको हो ।
नेप्सेमा लगातार वृद्धि भएको आज नवौं दिन हो । गत फागुन ४ गते यता लगातार बढिरहेका रहेको नेप्सेले आज पनि सोही लय कायम राखेको हो । पछिल्ला ९ कारोबार दिनमा नेप्से २११ अंकले बढेको छ ।
नेपाल राष्ट्र बैंकले गत साता मौद्रिक नीतिको अर्धवार्षिक समीक्षा मार्फत लचकता अपनाएपछि लगानीकर्ता उत्साहित हुँदा नेप्सेमा दैनिक उछाल आइरहेको हो ।
राष्ट्र बैंकले मौद्रिक नीतिमार्फत बैंकहरूको नाफा बढ्न सहयोग पुग्ने व्यवस्था गरेको छ । राष्ट्र बैंकले असल कर्जाको प्रोभिजनदर १.१० प्रतिशतबाट घटाएर १ प्रतिशतमा झारेको छ । त्यस्तै, ‘नन् डेलिभरेवल फरवार्ड’मा प्राथमिक पूँजीको २० प्रतिशतसम्म लगानी गर्न पाउने व्यवस्था गरेको छ ।
त्यस्तै, लघुवित्तहरूले पनि आगामी जेठदेखि बेसरेटको आधारमा कर्जाको ब्याजदर तय गर्न पाउने व्यवस्था गरेको छ । यी व्यवस्थाले लगानीकर्ता आशावादी बन्दा सूचकमा उच्च वृद्धि भएको हो ।
पछिल्लो समम अधिकांश सूचकहरू सेयर बजार अनुकूल रहेका छन् । बैंकिङ प्रणालीमा इतिहासकै धेरै तरलता कायम छ । ब्याजदर ३ वर्ष यताकै सस्तो भएको छ । नेपाल राष्ट्र बैंकले एकपछि अर्को लचकता अपनाउँदै आएको छ । अन्य क्षेत्रमा कर्जाको खासै माग नहुँदा बैंक तथा वित्तीय संस्थाहरूले पनि सेयर कर्जा लगानीलाई प्राथमिकतामा राखेका छन् । यिनै कारणले गर्दा आगामी दिनमा नेप्सेले नयाँ उचाइ लिने आशामा लगानीकर्ताले धामाधम सेयर किनरिहेको देखिन्छ ।
यसअघि लो क्याप कम्पनीको मात्रै सेयर मूल्य बढ्दै आएको थियो । तर, केही साता यता हाइ क्याप कम्पनीमा लगानीकर्ताको आकर्षण बढ्दो छ । हाइ क्याप कम्पनी चल्न थालेपछि बजारले गति लिने लगानीकर्ताहरूको भनाइ छ । यसअघि लघुवित्त, फाइनान्स लगायत थोरै पूँजी हुने कम्पनीम आकर्ष देखिन्थ्यो । अहिले धेरै पूँजी भएका बैंक, बीमा कम्पनी, पुनर्बीमा, सिमेन्ट लगायत कम्पनीमा लगानीकर्ताको आकर्षण देखिएको छ ।
आइतबार नेप्से परिसूचक ७५.२४ अंकले बढेर २८९०.२४ बिन्दुमा पुगेको छ । यो पछिल्लो ६ महिना यताकै उच्च विन्दु हो । आज सूचकसँगै कारोबार रकममा पनि उछाल आएको छ । अघिल्लो दिनको तुलनामा कारोबार रकम झण्डै ३ अर्बले बढेर १४ अर्ब २५ करोड रुपैयाँ पुगेको छ ।
आज कारोबारमा आएका १३ वटै समूहमध्ये म्यूचअल फण्ड बाहेक अरु सबै समूहको परिसूकच बढेको छ । फाइनान्स, होटल, उत्पादनमूलक, जीवन बीमा समूह्को परिसूचक ४ प्रतिशतभन्दा धेरैले बढेको छ ।
आज पनि पुनर्बीमा कम्पनीहरूको सेयरमा उच्च आकर्षण देखिएको छ । नेपाल पुनर्बीमा कम्पनीको सर्वाधिक ९७ करोड ५३ लाख रुपैयाँ बढीको सेयर किनबेच भएको छ । त्यस्तै, हिमालयन रि इन्स्योरेन्सको दोस्रो धेरै ८५ करोड ९३ रुपैयाँको कारोबार भएको छ ।
आज कारोबारमा आएका मध्ये १९६ कम्पनीको सेयर मूल्य बढेको छ भने ४४ कम्पनीको मूल्य घटेको छ ।
बढ्दो बजारमा आज ५ कम्पनीको सेयर मूल्यमा पोजेटिभ सर्किट लागेको छ । गार्डियन माइक्रो लाइफ इन्स्योरेन्स, हिमालयन डिस्ट्रीलरी, नेपाल लाइफ इन्स्योरेन्स, सिन्धु विकास बैंक र दोर्दी खोला जलविद्युत्को सेयर मूल्य १० प्रतिशतले बढेको छ ।
आज समाज लघुवित्तका सेयरधनीले भने सर्वाधिक १० प्रतिशत कमाएका छन् ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
