वीरगञ्ज । चालु आर्थिक वर्षको सात महिनामा वीरगञ्ज नाका हुँदै आठ अर्ब ६८ करोड रुपैयाँ बराबरको २२ करोड ६४ लाख आठ हजार दुई सय २९ किलोग्राम धान आयात भएको छ । यो परिमाण गत आर्थिक वर्षको सोही अवधिको तुलनामा ७२ प्रतिशतले वृद्धि भएको हो ।
गत आवको सात महिनामा चार अर्ब ९१ करोड रुपैयाँ बराबरको १३ करोड १८ लाख ५९ हजार चार सय १६ किलोग्राम धान आयात भएको वीरगञ्ज भन्सार कार्यालयले जनाएको छ । भन्सार कार्यालयका सूचना अधिकारी अमित तिवारीका अनुसार धान तथा चामलको आयातमा उल्लेखनीय वृद्धि देखिएको छ ।
धान मात्र होइन, नेपालमा चामलको आयात पनि बढ्दो क्रममा छ । चालु आवको सात महिनामा वीरगञ्ज नाका हुँदै एक अर्ब ३५ करोड रुपैयाँ बराबरको एक करोड ३३ लाख ७४ हजार आठ सय २६ किलोग्राम चामल आयात भएको छ । गत आवको सोही अवधिमा एक अर्ब छ करोड रुपैयाँ बराबरको ८१ लाख १७ हजार एक सय ३० किलोग्राम चामल आयात भएको थियो ।
त्यस्तै, मकै आयातमा भने सामान्य गिरावट देखिएको छ । चालु आवको सात महिनामा दुई अर्ब ९६ करोड रुपैयाँ बराबरको पाँच करोड ७७ लाख १४ हजार पाँच सय ८३ किलोग्राम मकै आयात भएको छ । गत आवको सोही अवधिमा दुई अर्ब ९७ करोड रुपैयाँ बराबरको छ करोड ६० लाख ४९ हजार नौ सय ७२ किलोग्राम मकै आयात भएको थियो ।
नेपाल कृषिप्रधान मुलुक भए पनि अन्नबालीको ठूलो परिमाणमा आयात हुनु चिन्ताको विषय भएको विज्ञहरूले बताएका छन् ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
