काठमाडौं । महाशिवरात्रिको अवसरमा पशुपतिनाथ मन्दिरमा दर्शन गर्न जाने भक्तजनका लागि विशेष ट्राफिक व्यवस्थापन लागू गरिएको छ।
काठमाडौं उपत्यका ट्राफिक प्रहरी कार्यालयका अनुसार पशुपति क्षेत्र वरपरका मुख्य मार्गहरूमा सवारी प्रवेशमा निषेध गरिएको छ भने पार्किङका लागि निश्चित स्थान तोकिएको छ।
पशुपति क्षेत्रमा हुने अत्यधिक भिडलाई व्यवस्थित गर्न ट्राफिक प्रहरीले गौशाला, सिनामंगल, चाबहिल, भीमसेनगोला, तिलगंगा, रातोपुल, कालोपुल, सिफल लगायतका क्षेत्रबाट पशुपतिनाथ जाने सवारीसाधनलाई प्रतिबन्ध लगाएको छ। यसका साथै गौरीघाटतर्फबाट समेत कुनै सवारी साधनलाई पशुपति क्षेत्रमा प्रवेश गर्न दिइने छैन।
पार्किङ व्यवस्थापनका लागि सिफलचौर, गुह्येश्वरीपारि, पशुपति क्षेत्र विकास कोषको कार्यालय, भण्डारखाल, अमालकोट र तिलगंगा करिडोर तोकिएको छ। सुरक्षाकर्मीका सवारी साधनको लागि महानगरीय प्रहरी वृत्त गौशालामा विशेष व्यवस्था मिलाइएको छ। भक्तजनका निजी सवारी साधनहरू तिलगंगा आँखा अस्पताल अगाडि, सिफलचौर र गुह्येश्वरी करिडोर सडकमा पार्किङ गर्न सकिने व्यवस्था गरिएको छ। दमकल, एम्बुलेन्स र खानेपानी ट्यांकरका लागि वनकाली क्षेत्रमा छुट्टै स्थान निर्धारण गरिएको छ।
महाशिवरात्रिमा ट्राफिक व्यवस्थापनलाई प्रभावकारी बनाउन करिडोर सडक र भित्री मार्गहरूमा विशेष प्रहरी परिचालन गरिएको छ। सम्भावित सवारी चोरी नियन्त्रणका लागि सादा पोशाकमा समेत ट्राफिक प्रहरी खटाइएको छ। भक्तजनको आवागमनलाई सहज बनाउन प्रहरी नायब उपरीक्षकको कमान्डमा कमाण्ड सेन्टर स्थापना गरी ८९० जना ट्राफिक प्रहरी प्रत्यक्ष रूपमा खटाइएको छ।
सवारी चापलाई ध्यानमा राख्दै आवश्यकतानुसार थप प्रहरी परिचालन गरिने जानकारी ट्राफिक प्रहरीका प्रवक्ता सञ्जयबहादुर राउतले दिएका छन्। ट्राफिक प्रहरीले सर्वसाधारणलाई तोकिएको रुट पालना गर्न र आफ्नो सवारी सुरक्षित स्थानमा राख्न आग्रह गरेको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
