काठमाडौं । काठमाडौं महानगरपालिकाले ‘एग्रो पुलिङ कार्यविधि, २०८१’ स्वीकृत गरेको छ । आइतबार बसेको महानगरपालिकाको ३७औँ कार्यपालिका बैठकले उक्त कार्यविधि पारित गरेको हो ।
कार्यविधि पारित भएसँगै महानगरले अन्य स्थानीय तहसँग सहकार्य गरी उक्त क्षेत्रमा उत्पादित कृषि तथा खाद्यान्न वस्तुको बिक्री र वितरण गर्ने व्यवस्था समेटिएका छन् ।
साथै, महानगर आफैंले पनि तरकारी तथा फलफूलको व्यापार गर्न सक्ने बाटो खुलेको छ । कार्यविधिमा महानगर आफैँले पनि खाद्यान्न तथा तकारी व्यापारका लागि कम्पनी खोल्न सक्ने व्यवस्था गरिएको छ ।
एग्रो पुलिङ महानगरपालिकाको स्वर्णिम योजना हो । अन्य पालिका र साझेदारसँगको सहकार्यमा महानगरवासीलाई गुणस्तरीय, स्वच्छ, ताजा खाद्यान्न तथा कृषिजन्य उत्पादन उचित मूल्यमा उपलब्ध गराउन उत्पादन तथा बिक्री वितरण गर्ने व्यवस्था कार्यविधिमा समेटिएका छन् ।
कार्यविधि अनुसार महानगरले कृषि उत्पादनका पकेट क्षेत्र पहिचान गरिएका स्थानीय तहसँग अर्गानिक खाद्यवस्तु उत्पादन गर्ने र वितरणका लागि महानगरभित्रका कृषि सहकारी वा कम्पनीसँग सम्झौता गर्नेछ ।
उत्पादकले गुणस्तरीय खाद्यान्न उत्पादन गर्ने, गुणस्तर परीक्षण गर्ने र महानगरपालिकामा भएको वितरकसम्म ढुवानी गर्ने काम गर्नेछ । उत्पादन, प्रशोधन तथा ढुवानीमा लाग्ने खर्च सम्बन्धित पालिकाले स्वीकृत गरेको दरमा गर्नुपर्नेछ । महानगरपालिकाले ‘प्रविधि’, ‘अनुदान’, ‘जनशक्ति’ र ‘भौतिक सामान’ सहयोग उपलब्ध गराउन सक्ने व्यवस्था कार्यविधिमा गरिएको छ ।
वितरकले महानगरपालिकाले स्वीकृत गरेको दररेटमा सामान बिक्री वितरण गर्नेछ । खाद्यान्न भण्डारण गर्ने, गुणस्तर परीक्षण गर्ने, प्याकेजिङ गर्ने, लेबलिङ गर्ने र विक्री वितरण गर्ने काम वितरकको हुनेछ । यसबाट किसानहरूले उचित मूल्य पाउने र उपभोक्ताले गुणस्तरीय खाद्यान्न प्राप्त गर्ने अवस्था सुनिश्चित हुने महानगरको विश्वास छ ।
उत्पादनलाई ८ समूहमा वर्गीकरण
कार्यविधि अनुसार पकेट क्षेत्रमा उत्पादन हुने वस्तुलाई विभिन्न ८ समूहमा वर्गीकरण गरिएको छ । समूहमा गुण मिल्ने अन्य खाद्यवस्तु समावेश हुन सक्ने व्यवस्था छ । यसअनुसार चामल, गहुँ, मकै, कोदो फापर एउटा समूहमा छन् । मास, मुसुरो, रहर र मुङ दाल दोस्रो समूहमा छन् । तेस्रो समूहमा सिमी, भटमास, गहत र बोडी राखिएको छ भने आलु, तरुल, पिँडालुजस्ता खाद्यान्न चौथो समूहमा छन् ।
त्यसैगरी, लसुन, प्याज, अदुवा, बेसार, खुर्सानी, टिमुर पाँचौँ, तेल, घिउ र दुग्धजन्य पदार्थ छैटौं समूहमा छन् । माछा, अण्डा, कुखुरा, खसी र राँगाको मासु सातौँ र मौसमी हरियो तरकारी र फलफूल आठौँ समूहमा राखिएको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
