पोखरा । राष्ट्रिय स्वतन्त्र पार्टीका सभापति रवि लामिछाने पक्राउ परेसँगै पोखरामा रास्वपा कार्यकर्ता र सहकारी पीडितहरू आमनेसामने हुने भएका छन् । रास्वपा कार्यकर्ताले लामिछानेको पक्राउ विरुद्ध प्रदर्शनको तयारी थाल्दै गर्दा सहकारी पीडितहरूले पनि सडक सङ्घर्ष थाल्ने भएका छन् ।
स्वतन्त्र पार्टी रास्वपाले आज पनि विरोधका कार्यक्रम जारी राख्ने बताएको छ।रास्वपाका कार्यवाहक प्रवक्ता मनिष झाले नियोजित रुपमा सरकारले आफ्ना सभापतिलाई पक्राउ गरेकाले विरोधका कार्यक्रम जारी राखिएको बताए।उनका अनुसार पोखराको शहीद चोकमा विरोधको कार्यक्रम राखिएको छ। यसका लागि रास्वपाका शीर्ष नेताहरु यसअघि नै पोखरा पुगिसकेका छन्।
यसैबीच,पोखरामा सहकारी पीडित र रास्वपाका नेताकार्यकर्ता आमने–सामने हुनसक्ने भन्दै प्रशासनले सुरक्षा व्यवस्था कडा पारेको छ।रविलाई प्रहरीले आज अदालतमा उपस्थित गराउने भएपछि विरोध तथा समर्थनमा दुबै पक्षले दबावका लागि उपस्थित हुन आह्वान गरेका छन्।रास्वपाका अधिकांश शीर्ष नेताहरु पोखरा पुगेर शनिबारदेखि नै प्रदर्शन तथा दबाव कार्यक्रम गरिरहेका छन्।
रास्वपाका नेताहरुले रविलाई उपस्थित गराउने कास्की जिल्ला अदालत नजिकैको शहीद चोकमा विरोध कार्यक्रममा उपस्थित भइदिनका लागि आह्वान गरेका छन् भने सहकारी पीडितहरुले पनि अनुसन्धान र न्यायका निम्ति दबाब दिन भन्दै सम्पूर्ण पीडितलाई राष्ट्र बैंक चोकमा उपस्थित हुन सार्वजनिक अपिल गरेका छन्।
सहकारी पीडितका पक्षमा उपस्थित हुन कांग्रेस, एमालेका नेताहरुलेसमेत सर्वसाधारणलाई दबाब सभामा आउन आह्वान गरिरहेका छन्।दुवै समूहले आफ्नो पक्षमा माहौल बनाउन शक्ति प्रदर्शनको तयारी गरेपछि प्रशासनले पोखरामा सुरक्षा व्यवस्थालाई मजबुत बनाएको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
