काठमाडौं । सरकारले पेट्रोलियम पदार्थमा इथानोल मिसाउने तयारी गरेको छ । उद्योग वाणिज्य तथा आपूर्तिमन्त्री दामोदर भण्डारीले पेट्रोलियम पदार्थमा इथानोल मिसाउने तयारी अन्तिम चरणमा पुगेको जानकारी दिएका हुन् ।
सोमबार नेपाल आर्थिक पत्रकार संघ (नाफिज)ले आयोजना गरेको ‘पेट्रोलियम पदार्थमा इथानोल मिश्रणको वृहत बहस’ कार्यक्रममा आफ्नो धारणा राख्दै मन्त्री भण्डारीले इथानोल मिश्रणको नीतिमा सरकारले आवश्यक तयारी पूरा गरिसकेको बताएका हुन् ।
उनले सरकारले इथानोल मिश्रणको नियामवली समेत बनिसकेको जानकारी दिएका छन् । ‘पेट्रोलियम पदार्थमा इथानोल मिश्रणको नियमावली बनिसकेको छ,’ मन्त्री भण्डारीले भने, ‘अब मूल्य निर्धारण गर्न बाँकी छ । यो पनि हामी एक महिनाभित्र टुंग्याउछौं ।’
उनले इथानोल मिश्रणका कामलाई अघि बढाउन सरकारले नेपाल आयल निगमलाई नीतिगत व्यवस्था मिलाउने निर्देशन दिइसकेको उनले बताए । इथानोल उत्पादनले दैनिक २ लाख किलोलिटर पेट्रोलियम पदार्थको खपत कम गर्ने अवस्था रहेको उनको भनाइ छ ।
नेपाल आयल निगमका कार्यकारी निर्देशक चण्डिकाप्रसाद भट्टले सरकार इथानोल उत्पादन र प्रयोगमा निकै अघि बढिसकेको बताएका छन् । उनले यसअघि सरकारले २०६० सालमै पेट्रोलियम पदार्थमा इथानोल मिश्रणको योजना बने पनि विभिन्न कारणले कार्यान्वयनमा ढिलाइ भएको बताए ।
उनले इथानोल मिश्रणको कार्यविधि बनाउन उद्योग विभागले स्वीकृति दिइसकेको जानकारी दिए । ‘अब केही समयमै इथानोल उत्पादनमा जान्छ । यो कुनै रकेट साइन्स होइन,’ उनले भने, ‘इथानोल प्रयोगले दैनिक ४ लाख किलोलिटर इन्धन खपत घटाउन सहयोग पुग्छ ।’
उनले अहिले धेरै उद्योगहरू इथानोल उत्पादन गर्न तयार रहेको बताए । २५ देखि ३० लाख रुपैयाँ लगानीमा नै इथानोल उत्पादनको प्लाण्ट निर्माण गर्न सकिने उनको भनाइ छ ।
नेपाल जस्तो पेट्रोलियम पदार्थ उत्पादन नहुने देशले इथानोल उत्पादन र मिश्रणमा जोड दिनुपर्ने उनको सुझाव छ । ‘राज्यले नीति बनाइसकेको छ, इथानोल मिश्रणको निर्णय गरिसकेको छ, हामी उत्पादनमा जान्छौं,’ उनले भने ।
कियान केमिकल विज्ञ दिनेश पौडेलले विस्तृत अध्ययन नगरी लडहका भरमा पेट्रोलियम पद्धार्थमा इथानोल मिसाउन नहुने बताए । उनले सरकारले २०६० सालमै पेट्रोलियम पद्धार्थमा इथानोल मिसाउन सकिने व्यवस्था गरे पनि कागजै सीमित भएको बताए ।
‘इथानोलको उत्पादन सम्भावना के हो ? यो नेपालमै उत्पादन गर्न सकिन्छ कि सकिँदैन ?, उनले प्रश्न गरे, ‘फेरि उत्पादन भएपछि पनि बजारको माग धान्न सक्छ कि सक्दैन ?’
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
