काठमाडौं । भारतीय प्रधानमन्त्री नरेन्द्र मोदी अहिले पोल्याण्ड र युक्रेनको भ्रमणमा रहेका छन् ।
उनी पोल्याण्डको भ्रमण पूरा गरेर शुक्रबार युक्रेन जान लागेको अन्तर्राष्ट्रिय सञ्चारमाध्यमहरुले जनाएका छन् । युक्रेन पुग्न मोदीले १० घण्टा लामो रेल यात्रा गर्ने छन् ।
सन् १९९२ मा भारत र युक्रेनबीच कूटनीतिक सम्बन्ध स्थापना भएपछि भारतीय प्रधानमन्त्रीको यो पहिलो भ्रमण हुनेछ । रुससँग चलिरहेको युक्रेन युद्धकाबीच सारा विश्वको नजर प्रधानमन्त्रीको यो भ्रमणमा छ । यसैबीच, संयुक्त राष्ट्र प्रमुखले प्रधानमन्त्री मोदीको युक्रेन भ्रमणले युद्ध अन्त्य गर्न मद्दत गर्ने आशा व्यक्त गरेका छन् ।
भ्रमणका क्रममा प्रधानमन्त्री मोदीले राष्ट्रपति भोलोडिमिर जेलेन्स्कीसँग भेटवार्ता गरेर युक्रेन द्वन्द्वको शान्तिपूर्ण समाधानका लागि पनि छलफल गर्ने बताइएको छ । झण्डै तीन दशकअघि दुई देशबीच कूटनीतिक सम्बन्ध स्थापना भएपछि भारतीय प्रधानमन्त्रीको यो पहिलो युक्रेन भ्रमण हो ।
अमेरिकाले प्रधानमन्त्री मोदीको युक्रेन भ्रमणलाई महत्वपूर्ण रहेको बताएको छ । त्यसअघि प्रधानमन्त्री मोदीले पोल्यान्डमा युद्ध समाप्त गर्नका लागि वार्ताको कूटनीति अपनाउनुपर्नेमा जोड दिएका थिए । उनले युक्रेन र पश्चिम एसियामा शान्ति प्रयासमा सहयोग गर्न भारत तयार रहेको बताए । युक्रेन र पश्चिम एसियामा शान्ति र स्थायित्वको प्रारम्भिक पुनर्स्थापनाका लागि मित्र राष्ट्रहरूलाई हरसम्भव सहयोग उपलब्ध गराउन भारत तयार रहेको प्रधानमन्त्री मोदीले बताएका थिए ।
वार्सामा पोल्यान्डका समकक्षी डोनाल्ड टस्कसँगको वार्तापछि सञ्चारमाध्यमसँग कुरा गर्दै मोदीले युक्रेन र पश्चिम एसियाको द्वन्द्व सबैका लागि गहिरो चिन्ताको विषय भएको बताएका थिए ।
युक्रेनका राष्ट्रपति जेलेन्स्कीको कार्यालयका अनुसार भारतीय प्रधानमन्त्री नरेन्द्र मोदीले युक्रेनको राष्ट्रिय झण्डा दिवसको दिन अगस्ट २३ मा युक्रेनको औपचारिक भ्रमण गर्ने छन् ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
