काठमाडौं । नेपाल राष्ट्र बैंकले झण्डै डेढ अर्ब रुपैयाँ रकम मुद्दती निक्षेपमा लगानी गर्ने भएको छ । केन्द्रीय बैंकले एक सूचना जारी गर्दै उपदान तथा पेन्सन कोषमा रहेको १ अर्ब ४३ करोड रुपैयाँ मुद्दतीमा राख्ने जानकारी गराएको हो ।
केन्द्रीय बैंकले क, ख र ग वर्गका बैंक तथा वित्त संस्थामा उक्त रकम मुद्दती निक्षेपमा राख्न लागेको हो । पेन्सन कोषको रकममध्ये १ अर्ब १४ करोड ४० लाख वाणिज्य बैंकमा, २१ करोड ४५ लाख विकास बैंक र ७ करोड १५ लाख रुपैयाँ फाइनान्स कम्पनीमा राख्न लागिएको राष्ट्र बैंकले जनाएको छ ।
राष्ट्र बैंकले उक्त रकम ३६६ दिनको अर्थात् २०८१ असार ३ गतेदेखि २०८२ असार ३ गतेसम्मका लागि उक्त रकम मुद्दतीमा राख्न लागेको हो । इच्छुक बैंक तथा वित्तीय संस्थाले आफूले मुद्दती निक्षेपमा लिन चाहेको रकम र प्रस्ताव गरेको ब्याजदरसमेत उल्लेख गरी जेठ २७ गते साँझ ७ बजेसम्म आवेदन बुझाउन सक्नेछन् ।
बैंक तथा वित्तीय संस्था सञ्चालनमा आएको कम्तीमा पनि दुई वर्ष, बैंकबाट तोकिएको न्यूनतम पूँजीकोष अनुपात कायम रहेको, निष्क्रिय कर्जा कूल कर्जा सापटीको ५ प्रतिशत भन्दा कम रहेको र खुद तरल सम्पत्ति स्वदेशी निक्षेपको कम्तीमा २० प्रतिशत वा सो भन्दा बढी रहेको हुनुपर्नेछ । कर्जा, निक्षेप अनुपात बैंकले समय समयमा निर्धारण गरेको सीमाभित्र रहेर शर्त पूरा गरेको हुनुपर्ने सूचनामा उल्लेख गरिएको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
