काठमाडौं । इन्फिनिटी लघुवित्त वित्तीय संस्थाको खुद नाफामा उछाल आएको छ । लघुवित्तले सार्वजनिक गरेको चालु आर्थिक वर्ष २०८०/८१ को तेस्रो त्रैमासिक वित्तीय विवरण अनुसार खुद नाफा २८०.५७ प्रतिशतले बढेको हो ।
चालु आवको चैत मसान्तसम्म लघुवित्तले ५ करोड २५ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा ३ करोड ८७ लाख रुपैयाँ धेरै हो । गत वर्ष चैतसम्म लघुवित्तले १ करोड ३८ लाख रुपैयाँ खुद नाफा कमाएको थियो ।
लघुवित्तको खुद ब्याज आम्दानी, संचालन नाफा बढ्दा र खराब कर्जा घट्दा नाफामा उल्लेख्य सुधार आएको हो । समीक्षा अवधिमा लघुवित्तको खुद ब्याज आम्दानी ३.८५ प्रतिशतले बढेर १९ करोड ९३ लाख रुपैयाँ पुगेको छ । यस्तै, सञ्चालन नाफा २८५.८६ प्रतिशतले बढेर ७ करोड ५१ लाख रुपैयाँ पुगेको छ ।
समीक्षा अवधिमा लघुवित्तले १ अर्ब २७ करोड निक्षेप संकलन र ३ अर्ब २७ करोड सापटी लिइ कुल ५ अर्ब १५ करोड कर्जा प्रवाह गरेको छ ।
हाल ४९ करोड ७४ लाख रुपैयाँ चुक्ता पूँजी रहेको लघुवित्तको जगेडा कोषमा २६ करोड ५७ लाख रुपैयाँ संचित छ । समीक्षा अवधिमा लघुवित्तको वितरण योग्य नाफा ४ करोड १६ लाख रुपैयाँ ऋणात्मक छ ।
खुद नाफा बढेसँगै लघुवित्तको प्रतिसेयर आम्दानी ४ गुणाले बढेको छ । समीक्षा अवधिमा लघुवित्तको प्रतिसेयर आम्दानी ३.७ रुपैयाँबाट बढेर १४.१ रुपैयाँ पुगेकोे छ ।
यस अवधिमा लघुवित्तको प्रतिसेयर नेटवर्थ १४४.४५ रुपैयाँ छ । समीक्षा अवधिमा लघुवित्तले खराब कर्जा दुईतिहाईले घटेको छ । गत चैतमा १४.०४ प्रतिशत रहेको लघुवित्तको खराब कर्जा घटेर ४.९७ प्रतिशतमा झरेको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
