काठमाडौँ । राष्ट्रिय स्वतन्त्र पार्टीका सभापति रवि लामिछानेले पछिल्लो समय वित्तीय संस्थाहरू बैङ्क र सहकारीमा देखिएको निराशा सरकारको प्राथमिकतामा पर्नुपर्ने बताएका छन् ।
सोमबार प्रतिनिधि सभाको बैठकपछि सञ्चारकर्मीहरूसँगको कुराकानी गर्दै सभापति लामिछानेले सरकारले सत्ता टिकाउने, सरकार चलाउने र सरकार जोगाउने किसिमका कामका लागि मात्रै संसद् नभएर जनतासँग उत्तरदायी भएर काम गर्नुपर्ने बताएका हुन् ।
लामिछानेले सरकारले सत्ता टिकाउने गरी आवश्यक नभएको विधेयक संसद्मा पेस गर्ने तयारी सुनिएको भन्दै जनताप्रति उत्तरदायी सदन बनाउनुपर्ने बताए । उनले भने, ‘जनता प्रति उत्तरदायी सदन भएको हुनाले जनतासँग मात्रै उत्तरदायी बनोस् । यसलाई सत्ता टिकाउने,सरकार चलाउने र सरकार जोगाउने किसिमका कामका लागि होइन । जनताप्रति उत्तरदायी भएर कानुन बनाउने र खराब कानुनको बेथिति छ । खराब कानुनलाई ठिक गर्न सकिएन भने अगाडि बढ्न सकिँदैन भन्ने सोचेर त्यसमा खबरदारी गर्ने गरी संसद्मा रास्वपा तयारीका साथ आएको छ । आवश्यकता भन्दा बाहिरका कानुनहरू संसद्मा ल्याउने भनिएको छ । ४० कानुन आवश्यक भनिएको छ । त्यसमा सम्पत्ति शुद्धीकरणका कुराहरू छन् । वित्तीय संस्थाहरूमा देखिएको चरम एउटा निराशाको अवस्थामा बैङ्क सहकारी लगायतमा देखिएको निराशा सरकारको प्राथमिकतामा पर्छ कि पर्दैनन् । यस्ता विषयहरू सरकारको प्राथमिकतामा परोस् ।’
उनले जिम्मेवार राजनीतिक दलको तर्फबाट यो संसद् अधिवेशनलाई प्रभावकारी बनाउन गर्नुपर्ने कामको तयारीका साथ आएको जिकिर गरे । उनले सरकारले संसद्मा बिजनेस बढी भन्दा बढी दिनुपर्ने बताए । ‘ जिम्मेवार राजनीतिक दलको तर्फबाट यो संसद् अधिवेशनलाई प्रभावकारी बनाउन गर्नुपर्ने कामको तयारीका साथ आएका छौँ । बाँकी सरकारमा निर्भर गर्छ । सरकारले अघिल्लो अधिवेशनमा जस्तो बिजनेस नदिने जस्तो काम नगरोस्,’ उनको भनाई थियो ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
