काठमाडौं । प्रभु बैंकको खुद नाफा एक अर्ब माथि पुगेको छ । बैंकले शुक्रबार सार्वजनिक गरेको चालु आर्थिक वर्ष २०८०/८१ को पहिलो त्रैमासिक वित्तीय विवरणले यस्तो देखाएको हो ।
समिक्षा अवधिमा बैंकको खुद नाफा ४६.७० प्रतिशतले बढेर १ अर्ब ३ करोड ४२ लाख रुपैयाँ पुगेको छ । गत वर्षको असोज मसान्तसम्ममा भने बैंकले ७० करोड ५० लाख रुपैयाँ मात्रै खुद नाफा कमाएको थियो ।
बैंकको खुद ब्याज आम्दानी र संचालन नाफा वृद्धि भएकाले नै खुद नाफा बढेको हो । समिक्षा अवधिमा बैंकको खुद ब्याज आम्दानी २९.१५ प्रतिशतले वृद्धि भई २ अर्ब ५४ करोड ८० लाख रुपैयाँ कायम भएको छ । चालु आवको असोज मसान्तसम्ममा बैंकको संचालन नाफा पनि ५१.३२ प्रतिशतले वृद्धि भई १ अर्ब ५४ करोड १५ लाख ६ ५ हजार रुपैयाँ पुगेको छ । समिक्षा अवधिमा बैंकको वितरणयोग्य नाफा भने १६ करोड ३४ लाख रुपैयाँ देखिएको छ ।
यस्तै, बैंकको निक्षेप संकलन भने घटेको देखिएको छ । समिक्षा अवधिमा बैंकले कुल २ खर्ब ७६ अर्ब १४ करोड ८७ लाख रुपैयाँ निक्षेप संकलन गरेको छ । सो अवधिमा बैंकको कर्जा लगानी भने २ खर्ब ३६ अर्ब ६६ करोड ४२ लाख रुपैयाँ पुगेको छ ।
बैंकको खराब कर्जा पनि वृद्धि भई ३.९७ प्रतिशत पुगेको छ । गत वर्षको सोही अवधिमा भने बैंकको यस्तो कर्जा १.६८ प्रतिशत मात्रै रहेको थियो ।
समिक्षा अवधिमा बैंकको प्रतिसेयर आम्दानी पनि ५ रुपैयाँले घटेको देखिएको छ । पहिलो त्रैमासमा बैंकको यस्तो आम्दानी १७ रुपैयाँ ५७ पैसा कायम भएको छ । यता, प्रतिसेयर नेटवर्थ पनि १४७ रुपैयाँ ८२ पैसा कायम भएको छ ।
बैंकको चुक्ता पुँजी २३ अर्ब ५४ करोड २४ लाख रुपैयाँ कायम भएको छ । बैंकले जगेडा तथा कोषमा भने १० अर्ब ९३ करोड २८ लाख रुपैयाँ राखेको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
