काठमाडौं । नेपाल राष्ट्र बैंकले शेयर धितो कर्जा सीमामा सामान्य हेरफेर गरेको छ । लगानीकर्ताको दबाब र चौतर्फी रुपमा भएको आलोचना थेग्न नसकेपछि राष्ट्र बैंकले बिहीबार एक निर्देशन जारी गर्दै यसअघि १२ करोड रहेको शेयर धितो कर्जाको व्यक्तिगत सीमा १५ करोड पुर्याएको छ ।
धितोपत्र बजारमा लगानी गर्ने मुख्य उद्देश्यले स्थापना भएका संस्थागत लगानीकर्ताहरुका लागि यस्तो कर्जाको अधिकतम सीमा २० करोड रुपैयाँ कायम गरिएको छ ।
यस्तो कर्जा प्रवाह गर्ने बैंक तथा वित्तीय संस्थाले कर्जा प्रवाह वा नवीकरण गर्दा उक्त सीमा ननाघेको यकिन गरेर मात्र कर्जा प्रवाह र नवीकरण गर्नुपर्ने राष्ट्र बैंकको निर्देशनमा छ ।
तोकिएको सीमा नाघी कर्जा, प्रवाह वा नवीकरण गरेमा बैंक तथा वित्तीय संस्थाले उक्त कर्जामा शतप्रतिशत कर्जा नोक्सानी व्यवस्था कायम गर्नुपर्ने केन्द्रीय बैंकले जनाएको छ ।
राष्ट्र बैंकले गत वर्ष कात्तिकबाट लागू हुने गरी शेयर धितो कर्जामा एकल ग्राहक कर्जा सीमा तोकेको थियो। एक ग्राहकले एउटा बैंकबाट चार करोड र पूरै प्रणालीबाट अधिकतम १२ करोड रूपैयाँसम्म कर्जा पाउन सकिने व्यवस्था गरेको थियो।
तर केही महिनाअघि चार करोडको सीमा नै हटाएको थियो।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
