काठमाडौं । सहिद स्मारक ‘ए’ डिभिजन लिग फुटबल प्रतियोगितामा जावलाखेल युथ क्लबले फ्रेन्ड्स क्लबलाई पराजित गरेको छ ।
सातदोबाटोस्थित च्यासल मैदानमा बिहीबार भएको खेलमा जावलाखेलले फ्रेन्ड्स क्लबलाई ४-१ गोलअन्तरले पराजित गरेको हो ।
जावलाखेलको जितमा एनकोटो मासोआबीले दुई गोल गरे भने राहुल र फोडे फोफानाले समान एक-एक गोल गरे ।
पराजित फ्रेन्ड्सका लागि भने श्यामबाबु क्यापछाकीले एक गोल फर्काए । खेलको २०औँ मिनेटमा राहुलले गोल गर्दै जावलाखेललाई सुरुआती अग्रता दिलाएका थिए ।
त्यसको छ मिनेटमा एनकोटोले जावलाखेलको अग्रता दोब्बर बनाए । त्यस्तै खेलको ६३औँ मिनेटमा उनले पेनाल्टीमार्फ व्यक्तिगत दोस्रो गोल गर्दै जावलाखेलको अग्रता तेब्बर बनाए ।
पेनाल्टी क्षेत्रभित्र एन्जल महर्जनले ह्यान्ड गरेपछि जाउलाखेलले पेनाल्टी पाएको थियो । जसको सदुपयोग एनकोटोले गरे ।
त्यस्तै खेलको ८०अैँ मिनेटमा फ्रेन्ड्स क्लबका श्यामबाबुले एक गोल फर्काए । खेलको दोस्रो हाफको अतिरिक्त समयमा फोडे फोफानाले गोल गर्दै जावलाखेललाई ४-१ को जित दिलाए ।
यस जितसँगै जावलाखेलको १७ खेलमा ३० अंक भएको छ र अंक तालिकाको शीर्षस्थानमा उक्लेको छ ।
चर्च ब्वाइजको पनि समान ३० अंक नै रहेको छ तर हेड टु हेडका आधारमा जाउलाखेल शीर्षस्थानमा रहेको हो । जावलाखेलले चर्च ब्वाइजलाई १-० गोलअन्तरले हराएको थियो ।
पराजित फ्रेन्ड्स १७ खेलमा १९ अंकसाथ ११अैँ स्थानमा छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
