काठमाडौं । ललितपुरको ग्वार्को चोकमा फ्लाइ ओभर निर्माण सुरू गरिएको छ । निर्माणको ठेक्का पाएको एमरएस आशिष-समानान्तर जेभीले आइतबारदेखि फिल्डमा काम सुरू गरेको हो ।
आज फ्लाइओभर बनाइने ग्वार्कोचोकको मुख्य सडकको कालोपत्र उप्काइएको छ । अब तीव्र गतिमा निर्माण कार्य अघि बढ्ने कम्पनीले जनाएको छ ।
पुसदेखि निर्माण सुरु हुने भनिए निर्माण सामग्री जुटाउन नसक्दा केही ढिलाइ भएको थियो । अहिले फ्लाइओभर निर्माणका लागि आवश्यक सबै सामग्रीहरु जुटाएपछि फिल्डमा काम थालिएको निर्माण जनाएको छ ।कम्पनीले निर्माण सामग्री सडकमा थुपार्दा जाम हुने भएपछि अन्य स्थानमै राखेको छ ।
फिल्डमा काम सुरु भएसँगै सवारी व्यवस्थापनका लागि काठमाडौँ उपत्यका ट्राफिक प्रहरीले सवारी लेन तोकेको छ । कोटेश्वरबाट सातदोबाटोतर्फ जाने यात्रुबाहक, माहलबाहक तथा दुई पाङ्ग्रे सवारी साधनहरूलाई बालकुमारी पुलबाट सर्भिस लेनमा र साना चारपाङ्ग्रे सवारी साधनहरूलाई फास्ट ट्रयाकबाट चलाइने छ ।
कोटेश्वरबाट सातदोबाटो तर्फ जाने र आउने सम्पूर्ण सवारी साधनलाई ग्वार्को चोकभन्दा ६०० मिटर अगाडि र पछाडि सर्भिस लेन हुँदै चलाइने छ ।
बल्खुबाट सातदोबाटो हुँदै कोटेश्वरतर्फ आउने यात्रुबाहक, माहलबाहक तथा दुईपाङ्ग्रे सवारी साधनलाई बल्खुबाट सर्भिस लेनमा र साना चारपाङ्ग्रे सवारी साधनलाई फास्टट्रयाकबाट संचालन गरिने ट्राफिक प्रहरीले जनाएको छ ।
आशिष(समानान्तर जेभीले १७ करोड ६८ लाख ८८ हजार ८०८ रुपैयाँमा फ्लाइओभर निर्माण सम्पन्न गर्नेगरी ठेक्का पाएको छ ।
फ्लाइओभर इन्जिनियरिङ प्रोक्युरमेन्ट कन्स्ट्रक्सन (ईपीसी) मोडलमा निर्माण गर्न लागिएको हो । सम्झौता अनुसार कम्पनीले ४ महिनामा डिजाइन् र २० महिनामा निर्माण गरी २ वर्षमा काम सम्पन्न गरिसक्नुपर्ने छ । उक्त फ्लाइओभर ४५५ मिटर लामो हुनेछ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
