काठमाडौं । मुलुकको व्यापार घाटामा सुधार आएको छ । चालु आर्थिक वर्षको पहिलो महिना साउनदेखि सुधार आएको व्यापार घाटाले पुससम्म सोही लय कायम राखेको हो ।
भन्सार विभागले सार्वजनिक गरेको तथ्यांक अनुसार चालु आवको ६ महिना (साउन–पुस)मा मुलुकको व्यापार घाटा गत वर्षको सोही अवधिको तुलनामा १९.१५ प्रतिशतले घटेको छ ।
पुस मसान्तसम्म व्यापार घाटा ७ खर्ब ११ अर्ब ८५ करोड रुपैयाँ रहेको विभागले जनाएको छ । जबकी गत वर्ष सोही अवधिमा मुलुकको व्यापार घाटा ८ खर्ब ८० अर्ब ४९ करोड रुपैयाँ थियो ।
सरकारले वस्तु आयातमा लगाएको प्रतिबन्धका कारण व्यापार घाटा केही कम भएको हो । समीक्षा अवधिमा वस्तु आयात र निर्यात दुवै घटेको छ ।
पुस मसान्तसम्ममा ७ खर्ब ९२ अर्ब ६६ करोड रुपैयाँ बराबरको वस्तु आयात भएको छ । गत वर्षको सोही अवधिको तुलनामा आयात २०.६८ प्रतिशतले घटेको हो । गत वर्ष पुससम्म ९ खर्ब ९९ अर्ब ३४ करोडको रुपैयाँ बराबरको वस्तु आयात भएको विभागको तथ्यांक छ ।
यस्तै, समीक्षा अवधिमा निर्यातमा पनि ठूलो गिरावट आएको छ । चालु आवको ६ महिनामा नेपालबाट ८० अर्ब ८० करोड बराबरको वस्तु निर्यात भएको छ । गत वर्षको सोही अवधिको तुलनामा निर्यात करिब ३२ प्रतिशतले कम हो । गत वर्षको यसै अवधिमा १ खर्ब १८ अर्बको निर्यात भएको थियो ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
