काठमाडौं । दृष्टिविहीन, शारीरिक अशक्तता वा अन्य कारणले मतदान गर्न नसक्ने मतदाताका वारेसप्रति निगरानी राख्न प्रमुख निर्वाचन आयुक्त दिनेशकुमार थपलियाले निर्देशन दिएका छन्।
अशक्तताको नाम लिएर राजनीतिक दलका प्रतिनिधिले विगतमा आफूखुसी वारेस बनेर मतदान गरेका घटना बाहिर आएकाले आगामी निर्वाचनमा त्यसो हुन नदिन थपलियाले निर्वाचन अधिकृतलाई निर्देशन दिएका हुन्।
उनले गत स्थानीय तहको निर्वाचनमा दृष्टिविहीन वा शारीरिक अशक्तता भएका अथवा अन्य कारणले मतदान गर्न नसक्ने मतदाताको नाममा कुनै उम्मेदवार वा राजनीतिक दलको प्रतिनिधिले वारेस बनी मतदान गर्दा भनेअनुसार मतदान नभएको गुनासो आएकाले चनाखो हुन मतदान अधिकृतलाई सुझाए।
गत स्थानीय तह निर्वाचनमा आफैं मतदान गर्न सक्ने मतदाताले समेत आफू अशक्त भएको बहाना बनाई अरुमार्फत मतदान गराएका केही उदाहरण आएकाले त्यसप्रति सचेत रहन उनले आग्रह गरे। आगामी निर्वाचनमा पनि सोही प्रकृतिका घटना दोहोरिए त्यसमा संलग्न जोसुकैलाई कारबाही हुने उनले चेतावनी दिए।
कुनै मतदाताले आफू मतदान गर्न सक्षम हुँदाहुँदै विभिन्न बहाना बनाएर अरुमार्फत मतदान गराए निर्वाचन कसुर तथा सजाय ऐनअन्तर्गत कारबाही हुने उनले बताए।
प्रमुख निर्वाचन आयुक्त थपलियाले निर्वाचन प्रक्रियालाई समावेशी, लैंगिक एवं अपांगतामैत्री बनाउन सम्बन्धित प्रमुख निर्वाचन अधिकृतलाई निर्देशन दिए।
उनले मतदान स्थलको सम्पूर्ण व्यवस्थापन गर्दा अपांगता, सुत्केरी, ज्येष्ठ नागरिक, बिरामी, अशक्तलाई सहज पहुँचको सुनिश्चितता कायम गर्ने गरी मतदान केन्द्र निर्माण गर्न आग्रह गरे।
मतदान अधिकृतले गर्भवती, सुत्केरी, अशक्त, ज्येष्ठ नागरिक, बिरामी, किरियापुत्री र आफ्नो काखमा बालबालिका लिएर आएका महिला र अपांगता भएकालाई विशेष प्राथमिकता दिई धेरै समय कुर्नु नपर्ने गरी मतदान व्यवस्था मिलाउन निर्देशन दिए।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
