काठमाडौं । सप्तकोसी नदीमा पानीको बहाब अत्यधिक बढ्ने आकलनसँगै प्रशासनले हाइ अलर्ट जारी गरेको छ । पहाडी जिल्लामा निरन्तर वर्षा भएसँगै सप्तकोसीका सहायक नदीहरूमा पानीको सतह अत्यधिक बढेको छ । यसले कोसीमा पानीको बहाब अस्वभाविक बढ्ने अनुमान गरिएको छ ।
कोसी नदीमा पानीको अत्यधिक बहाब हुनसक्ने जानकारीपछि कोसी ब्यारेजसहित कोसीको संरचनालाई निगरानी गरिरहेको सप्तरी प्रशासनले जनाएको छ । तटीय क्षेत्रका बासिन्दालाई सतर्क रहनसमेत आग्रह गरिएको छ ।
पानीको बहाब हेर्दा शनिबार साँझसम्म कोसी ब्यारेज भएर ५ लाख क्युसेकभन्दा बढी प्रति सेकेन्डका दरले बहाब हुनसक्ने अनुमान गरिएको छ । ब्यारेजको संरचनासहित तटीय क्षेत्रमा उच्च सतर्कता अपनाएको छ ।
कोसीमा अत्यधिक बहाब हुनसक्ने भएपछि सुनसरीमा पनि उच्च सतर्कता अपनाइएको छ । बस्तीतर्फ कोसी प्रवेश गरेकोले उदयपुरमा पनि उच्च सतर्कता अपनाइएको छ ।
शनिबार मध्याह्न १२ बजे गरिएको मापन अनुसार कोसी ब्यारेज भएर २ लाख २ हजार ४ सय ७५ क्युसेक पानी प्रति सेकेन्डका दरले बहाब भइरहेको छ । ब्यारेजका २९ वटा ढोका खोलिएको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
