काठमाडौं । अब काठमाडौंबाट भारतको राजधानी नयाँ दिल्लीका लागि सातामा १० उडान हुने भएको छ ।
नेपाल नागरिक उड्डयन प्राधिकरणले सेप्टेम्बर महिनाका लागि सार्वजनिक गरेको अन्तर्राष्ट्रिय उडान तालिका अनुसार १० उडान हुने भएको हो ।
नयाँ तालिका अनुसार नेपाल एयरलाइन्स र भारतीय ध्वजाबाहक एयर इण्डियाले सातामा १० उडान गर्ने भएका हुन् । जसमा नेपाल एयरलाइन्सले दैनिक एक उडान र एयर इण्डियाले साताको तीन (आइतबार, मंगलबार र शुक्रबार) उडान गर्ने प्राधिकरणले जनाएको छ ।
प्राधिकरणको तालिका अनुसार एयर अरेबियाले यूएईबाट काठमाडौंका लागि दैनिक ३ उडान गर्ने अनुमति पाएको छ । एयर अरेबियाले सारजहा विमानस्थलबाट दैनिक दुई र आबुधाबीबाट हरेक दिन काठमाडौंका लागि एक गरी तीन उडान गर्नेछ । यस्तै, फ्लाई दुबईको जहाज दुबई इन्टरनेसनल एयरपोर्टबाट काठमाडौंका लागि सातामा १० उडान हुने छन् ।
हिमालय एयरलाइन्सले काठमाडौंबाट मलेसियाको क्वालालाम्पुर विमानस्थलमा सोमबार बाहेक साताको ६ उडान गर्नेछ । यस्तै, हिमालयनले दुबई विमानस्थलमा शुक्रबार बाहेक साताको ६ उडान र कतारको हमाद इन्टरनेशनल विमानस्थटलमा सातामा ७ उडान गर्ने प्राधिकरणको तालिका छ ।
यस्तै, जजिरा एयरवेज कुवेतबाट दैनिक एक, कोरियन एयरले दक्षिण कोरियाबाट हरेक बुधबार, मलेसिया एयरलाइन्सले हरेक शनिबार, मालिन्दो एयरले क्वालालाम्पुरबाट साताको चार (सोमबार, बुधबार, शुक्रबार र शनिबार) काठमाडौंका लागि उडान गर्नेछ ।
यस्तो छ सेप्टेम्बरका लागि अन्तर्राष्ट्रिय उडान तालिका
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
