काठमाडौं । नेपालमा इन्टरनेटको पहुँच बढ्दो क्रममा छ।
नेपालमा विभिन्न सेवा प्रदायकमार्फत दिइएको इन्टरनेट सेवा प्रयोगकर्ताको संख्या २ करोड ४७ लाख ३५ हजार ६ सय ५० जना पुगेको छ ।
जसमा १ करोड ८० लाख मानिसले मोबाइल डेटाबाट इन्टरनेट प्रयोग गर्ने गरेका छन् ।
नेपाल दूरसञ्चार प्राधिकरणले सार्वजनिक गरेको भदौ महिनाको एमआईएस (म्यानेजमेन्ट इन्फरमेसन सिस्टम) प्रतिवेदन अनुसार नेपालमा ब्रोडव्यान्ड इन्टरनेट प्रयोगकर्ता मध्ये १ करोड ८० लाख २६ हजार ६ सय ४६ जनाले मोबाइल डेटाबाट इन्टरनेट प्रयोग गर्ने गरेका हुन् ।
प्राधिकरणको तथ्यांक अनुसार तारको मद्दतमा ब्रोडव्याण्ड चलाउने ६४ लाख ७६ हजार २ सय २३ जना रहेका छन् । त्यस्तै तार बिना ब्रोडव्याण्ड प्रयोग गर्ने मानिसको संख्या २ लाख ३४ हजार ७ सय ७२ जना रहेको छ ।
प्राधिकरणको पछिल्लो तथ्यांक अनुसार नेपालमा मोबाइलबाट इन्टरनेट चलाउने मानिसको कुल संख्यामध्ये १ करोड २५ लाख नेपाल टेलिकमकै प्रयोगकर्ता छन् ।
कुल १ करोड २५ लाख १५ हजार ५ सय २७ जना टेलिकमको मोबाइल इन्टरनेट प्रयोगकर्ता रहेकोमा फोरजी प्रयोगकर्ताको संख्या २३ लाख ८३ हजार २ सय ५६ जना छ भने थ्रिजी प्रयोगकर्ताको संख्या ८६ लाख ३४ हजार २ सय ७७ जना छ ।
एनसेलको मोबाइल इन्टरनेट प्रयोगकर्ताको संख्या ६६ लाख ५२ हजार ८ सय ३२ जना रहेको छ । जसमा ४० लाख ८६ हजार १ सय ३९ जनाले फोरजी प्रयोग गर्छन् भने २५ लाख ६६ हजार ६ सय ९३ जनाले थ्रिजी प्रयोग गर्छन् ।
यस्तै, स्मार्ट सेलको मोबाइलबाट इन्टरनेट चलाउने मानिसको संख्या २ लाख १९ हजार ७ सय ८ जना रहेको छ । यी सबै मानिसले फोरजी प्रयोग गर्छन् ।
एनसेल र स्मार्टको मोबाइल इन्टरनेट मात्रै छ भने नेपाल टेलिकमको एडीएसएल, एफटीटीएच, इन्टरनेट लिज लाइन र वाइम्याक्स सेवा पनि प्रदान गर्दै आएको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
