काठमाडाैं। डिभिजन सडक कार्यालय काठमाडौंले जिल्लाका विभिन्न स्थानमा अपङ्गतामैत्री पैदलयात्रु मार्ग निर्माण गर्ने भएको छ।
चालु आर्थिक वर्षको पहिलो चौमासिकमा डिभिजनले योजना बनाउँदा पैदलयात्रु मार्ग निर्माणमा ध्यान दिने गरी योजना बनाएको हो।
सिंहदरबार आसपासका क्षेत्रमा अपाङ्गतामैत्री पैदलयात्रु मार्ग निर्माण सुरु भइसकेको डिभिजन प्रमुख कुवेर नेपालीले बताए। उनका अनुसार डिभिजनले पैदलयात्रुको चाप बढी भएका सडकमा पहिलो चरणमा पैदलयात्रु मार्ग अघि बढाउँदै छ। उनले भने, “विस्तारै सबै सडकमा यसलाई विस्तार गर्दै लगिने छ।”
डिभिजनले बढी चाप भएका सडकसँगै निर्माणका क्रममा रहेका सडकमासमेत अपाङ्गतामैत्री पैदलयात्रु मार्ग निर्माण गर्ने योजना बनाएको छ। हाल निर्माण भइरहेको गौशाला-चावहिल सडकमा यसलाई अघि बढाइएको प्रमुख नेपालीले बताए।
त्यस्तै, सडक निर्माणका लागि निर्माणस्थल खाली भइरहेको कोटेश्वर-जडीबुटी सडकमा पनि पैदलयात्रु मार्ग निर्माण गरिने भएको छ। गत वर्षमा आवधिक मर्मतको काम गरेर खाल्डाखुल्डी धेरै ठाउँमा हटाएको डिभिजनले यस वर्ष पैदलयात्रु मार्गतर्फ ध्यान दिएको हो। “सरल, सहज र अपाङ्गतामैत्री पैदलयात्रु मार्ग बनाउँदा सबैलाई हिँड्न सजिलो हुने छ,” उनले भने।
डिभिजनले सङ्घीय सरकारअन्तर्गत सडकको मर्मत र स्तरोन्नतिको काम गर्दै आएको छ। सङ्घअन्तर्गत धेरै सडकमा पैदलयात्रु मार्ग छैन। कतिपय स्थानमा भए पनि अपाङ्गता भएका व्यक्ति मात्रै मात्रै होइन अरु पैदलयात्रुलाई समेत आवतजावत कठिन हुने किसिमको रहेको देख्न सकिन्छ। -रासस
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
