काठमाडौं । काठमाडौँको तारकेश्वर नगरपालिकामा स्वास्थ्य मन्त्रालय अन्तर्गतको सरकारी नम्बर प्लेटको गाडी दुर्घटनामा परेको छ ।
बा १ झ ६६५८ नम्बरको गाडी तारकेश्वर नगरपालिका–२ भेडीगोठमा शनिबार बेलुका सात बजेतिर सडक किनारको बिजुलीको पोलमा ठोक्किएर दुर्घटनामा परेको प्रहरी चौकी धर्मस्थलीले जनाएको छ ।
चालकले मादक पदार्थ सेवन गरी तीव्र गतिमा चलाएको गाडी सडक छेउको बिजुलीको पोलमा ठोक्किँदा दुर्घटना भएको स्थानीय बासिन्दालाई उद्धृत गर्दै प्रहरीले जनाएको छ ।
गाडी अहिले प्रहरी चौकी धर्मस्थलीको नियन्त्रणमा छ । गाडीमा चालक र अर्का एकजना रहेको स्थानीय बासिन्दाले बताए पनि दुवैजना फरार रहेको धर्मस्थली प्रहरी चौकीका असई विष्णु भण्डारीले जानकारी दिए ।
ठक्करबाट भाँच्चिएको बिजुलीको पोल गाडीमाथि ढलेको भए पनि कोही घाइते नभएको प्रहरीले जनाएको छ । घटनाबारे अनुसन्धान भइरहेको प्रहरीको भनाई छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
