‘भन्सारमा सुशासनका लागि पात्र र पद्धति दुवै सुधारिनुपर्छ’

काठमाडौं । अर्थ मन्त्रालयका राजस्व सचिव डा. भूपाल बरालले पात्र, प्रणाली र पद्धतिको सुधारबाट मात्र भन्सार प्रशासनमा सुशासनको प्रत्याभूति हुने बताएका छन् ।

७४औँ अन्तर्राष्ट्रिय भन्सार दिवसको अवसर पारेर नेपाल भन्सार एजेन्ट सङ्घ काठमाण्डौद्वारा शुक्रबार आयोजित ‘राजश्व सुरक्षा र व्यापार सहजीकरणमा त्रि.वि. भन्सार कार्यालय, निजी क्षेत्र तथा भन्सार एजेन्टबिच साझेदारी’ विषयक अन्तरक्रिया कार्यक्रममा उनले यस्तो बताएका हुन् ।

सचिव बरालले भन्सार सुधारका लागि भन्सार प्रशासन, निजी क्षेत्र र भन्सार एजेन्ट सबै उत्तिकै जिम्मेवार रहनुपर्नेमा जोड दिए ।उनले भन्सार जाँचपासका क्रममा मालवस्तुको वास्तविक कारोबार मूल्यका आधारमा सही घोषणा गर्नुपर्नेमा जोड दिए ।

कार्यक्रममा भन्सार विभागका महानिर्देशक श्याम प्रसाद भण्डारीले भन्सार प्रशासनको पहिलो प्राथमिकता व्यापार सहजीकरण भएको बताए । उनले भन्सारमा देखिएका समस्याहरू समाधान गर्दै नेपालको भन्सार प्रशासनलाई अन्तर्राष्ट्रिय स्तरको रूपमा विकास गर्न विभाग निरन्तर लागि परेको उल्लेख गरे ।

सो अवसरमा उद्योग वाणिज्य सङ्घ काठमाण्डौका अध्यक्ष दिनेश श्रेष्ठ तथा नेपाल चेम्बर अफ कमर्सका महानिर्देशक देवेन्द्र लामिछानेले भन्सार प्रशासन, निजी क्षेत्र र भन्सार एजेन्टबिचको सहकार्यले मात्र देशको राजस्व सङ्कलनमा वृद्धि हुने बताए । उनले वैध व्यापार सहजीकरणमा राज्य थप जिम्मेवार हुनुपर्ने कुरामा जोड दिए ।

त्रिभुवन विमानस्थल भन्सार कार्यालयका प्रमुख विष्णु प्रसाद ज्ञवालीले कार्यालय सुधारका लागि सकारात्मक पहल गरिरहेको बताए । उनले जनअपेक्षा बमोजिमको भन्सार कार्यालय बनाउन सबै सरोकारवाला पक्ष जिम्मेवार भएर लाग्नुपर्ने बताए ।

भन्सार एजेन्ट सङ्घ काठमाण्डौले आयोजना गरेको उक्त कार्यक्रममा सहभागीहरूले त्रिभुवन विमानस्थल भन्सार कार्यालयको सुधार तथा व्यापार सहजीकरणमा त्रिपक्षीय भूमिका महत्त्वपूर्ण हुने निष्कर्ष निकालेका छन् ।