नेपालको आर्थिक वृद्धि दर २.३ प्रतिशतमा सीमित हुने विश्व बैंकको अनुमान

काठमाडौँ। विश्व बैंकले चालु आर्थिक वर्ष २०८२/८३ मा नेपालको आर्थिक वृद्धि दर २.३ प्रतिशतमा सीमित रहने अनुमान सार्वजनिक गरेको छ। ‘नेपाल डेभलपमेन्ट अपडेट अप्रिल २०२६’ प्रतिवेदनमा कृषि उत्पादनको उतारचढाव र खाडी मुलुकमा जारी द्वन्द्वले अर्थतन्त्र प्रभावित भएको उल्लेख छ।

गत आवको वृद्धि दर ४.६ प्रतिशत थियो, र आगामी आवमा पुनर्निर्माण, जलविद्युत् विस्तार र स्थानीय निर्वाचनले वृद्धि दर ४.४ प्रतिशत पुग्ने विश्व बैंकको अनुमान छ। चालु आवको दोस्रो त्रैमासमा वृद्धि दर ४.०५ प्रतिशत रहेको छ, जबकि सरकारले लक्ष्य ६.५ प्रतिशत राखेको छ।

प्रतिवेदनअनुसार सेवा क्षेत्र, विशेष गरी पर्यटन, यातायात लागत वृद्धि र आपूर्ति शृङ्खलामा अवरोधले बढी असर पारेको छ। राजनीतिक स्थिरता र संरचनात्मक सुधारले निजी लगानीकर्ताको विश्वास बढाउन सक्ने उल्लेख गरिएको छ।

विश्व बैंकका निर्देशक डेभिड सिसलेनले रोजगारी र आर्थिक मजबुतीका लागि निजी क्षेत्रको नेतृत्व महत्वपूर्ण रहेको बताए। दक्षिण एसियामा क्षेत्रीय वृद्धि दर ७ प्रतिशतबाट ६.३ प्रतिशतमा सीमित हुने देखिएको छ, तर अन्य विकासोन्मुख देशसँग तुलना गर्दा अझै द्रुत रहने अनुमान छ।