पौष २६ गतेदेखि माघ ३ गतेसम्म ट्राफिक सप्ताह-२०८२ आयोजना हुने

काठमाडौं । काठमाडौं उपत्यका ट्राफिक प्रहरी कार्यालयले सवारी दुर्घटना न्यूनिकरण विशेष अभियान तथा ट्राफिक सप्ताह–२०८२ आयोजना गर्ने भएको छ।

बिहीबार कार्यालयमा पत्रकार सम्मेलनको आयोजनागरी प्रहरी उपरीक्षक नरेशराज सुवेदीले आगामी पौष २६ गते देखि माघ ३ गतेसम्म ट्राफिक सप्ताह–२०८२ आयोजना गर्न लागेको जानकारी दिए।

उनले सवारी दुर्घटना न्यूनीकरण गर्ने, सडक प्रयोगकर्ताको व्यवहारमा सुधार गर्ने , ट्राफिक नियमको निष्पक्ष पालना गर्ने उद्देश्यले कार्यक्रमको आयोजना गर्न लागेको जानकारी दिए।

‘सवारी दुर्घटना न्यूनीकरण गर्ने, सडक प्रयोगकर्ताको व्यवहारमा सुधार गर्ने, ट्राफिक नियमको निष्पक्ष पालना गर्ने, सडक दुर्घटनाबाट हुने मानवीय, सामाजिक तथा आर्थिक क्षति न्यूनिकरण गरी अनुशासित यातायात प्रणालीको विकासमा टेवा पुर्याउनजे उद्देश्यले गर्न लागेको हौं,’ उनले भने।

उनले मुख्य चोकहरूमा सचेतना कार्यक्रम, सवारी साधनमा स्टिकर टाँस्ने, माइकिङ, जेब्रा क्रसिङ नभएका ठाउँमा सुरक्षित बाटो काट्ने तालिम, चालक–सहचालकलाई विशेष काउन्सेलिङ, विद्यालय, आमा समूह र टोल सुधार समितिमा जागरण कार्यक्रमहरू सञ्चालन गरिने पनि जानकारी दिए।

उपरीक्षक जोशीले चालकको व्यवहारमा सुधार र सडक तथा सवारी साधनको अवस्थामा सुधार नगरेसम्म दुर्घटना न्यूनिकरण गर्न अत्यन्तै चुनौतीपूर्ण रहेको बताए।

चालकको व्यवहारमा सुधार, सडक तथा सवारी साधनको अवस्थामा सुधार नगरेसम्म दुर्घटना न्यूनिकरण गर्न अत्यन्तै चुनौतीपूर्ण हुने भएकाले सडक प्रयोगकर्ताहरुको व्यवहार सुधारको लागि रात्रिकालिन समयमा सचेतना, मादक पदार्थ सेवन गरेर सवारी चलाउने, तिव्र गति, रातो बत्ती र लेन अनुशासन कायम नगर्नेलाई जनचेतना कार्यक्तम समेत सञ्चालन गरेको छौं । सडक प्रयोगकर्ताहरुको व्यवहार सुधार गरी दुर्घटना न्यूनिकरण गर्नु ट्राफिक प्रहरीको मुख्य प्राथमिकताको विषय हो,’ उनले भने।

सवारी साधनको संख्यामा उल्लेखनीय वृद्धि भइरहेको र सो अनुपातमा सडकको विकास र विस्तार गर्न नसकेकाले सबै प्रकारका सवारी साधनहरु एउटै लेनमा चल्नुपर्ने अवस्थाले ट्राफिक जामको समस्या हुने गरेको उनको भनाई छ।

‘सवारी साधनको संख्यामा उल्लेखनीय वृद्धि भइरहेको र सो अनुपातमा सडकको विकास र विस्तार गर्न नसकेकोले सबै प्रकारका सवारी साधनहरु एउटै लेनमा चल्नुपर्ने अवस्थाले गर्दा राजधानिका विभिन्न स्थानमा ट्राफिक जामको समस्या हुने गरेको छ। काठमाडौंमा दैनिक १८ लाखभन्दा बढी सवारी साधनहरु चल्ने गरेको तथ्यांकले देखाएको छ’ उनले भने।