रास्वपा र उज्यालो नेपाल पार्टीबीच भएको सहमतिमा के छ? (पूर्ण पाठसहित)

काठमाडौं । राष्ट्रिय स्वतन्त्र पार्टी (रास्वपा) र उज्यालो नेपाल पार्टीबीच विधिवत् रूपमा पार्टी एकता भएको छ । सोमबार दुई पक्षीय छलफलपछि सात बुँदे सहमति पत्रमा हस्ताक्षर गर्दै दुई पार्टीबीच एकताको घोषणा गरिएको हो।

सहमति अनुसार एकीकृत पार्टीको सभापतिमा रवि लामिछाने नै रहनेछन् भने पार्टीमा अब तीन जना उपसभापति रहने व्यवस्था गरिएको छ । उज्यालो नेपाल पार्टीका संरक्षक कुलमान घिसिङलाई रास्वपाको पहिलो वरीयताको उपसभापति बनाउने सहमति भएको छ । घिसिङसँगै डीपी अर्याल र डा. स्वर्णिम वाग्ले पनि उपसभापति रहने छन् ।

पार्टी एकताको सहमति पत्रमा रास्वपाका सभापति रवि लामिछाने र उज्यालो नेपाल पार्टीका अध्यक्ष अनुपकुमार उपाध्यायले हस्ताक्षर गरेका छन् । यो राजनीतिक मिलापमा काठमाडौं महानगरपालिकाका मेयर बालेन्द्र (बालेन) शाहलाई साक्षीका रूपमा राखिएको छ ।

एकता प्रक्रियामा चुनाव चिह्नका विषयमा केही समय विवाद देखिएको थियो । उज्यालो नेपालका संरक्षक कुलमान घिसिङले पार्टीको नाम रास्वपा नै रहने भए चुनाव चिह्न ‘बलिरहेको बत्ती’ राख्नुपर्ने अडान राख्दै आएका थिए । तर, सोमबार साँझ भएको निर्णायक वार्तामा उज्यालो नेपाल पक्ष आफ्नो अडानबाट पछि हटेपछि एकीकृत पार्टीको चुनाव चिह्न ‘घण्टी’ नै रहने टुङ्गो लागेको हो ।

एकीकृत पार्टीको झण्डा साविककै रास्वपाको स्वरूपमा रहनेछ, जसमा निलो पृष्ठभूमिको मध्य भागमा सेतो रङको गोलाकारभित्र निलो रङको घण्टीको आकृति रहनेछ । एकीकृत पार्टीको केन्द्रीय कार्यालय काठमाडौँ उपत्यकामा रहने सहमति भएको छ ।

यसअघि रास्वपा र बालेनबीच बृहद एकता भइसकेको छ ।

सहमतिको पूर्ण पाठ:

राष्ट्रिय स्वतन्त्र पार्टी (रास्वपा) तथा उज्यालो नेपाल पार्टी (उनेपा) बीच एकता सम्बन्धी सहमति पत्र

मुलुकको परिवर्तित राजनीतिक घटनाक्रमले सिर्जना गरेको विशिष्ट परिस्थितिलाई हृदयंगम गरी सबै नेपालीको समतामूलक उन्नतिप्रति कटिबद्ध सामाजिक न्याय सहितको उदार अर्थतन्त्रमा विश्वास गर्ने बहुलवादी लोकतान्त्रिक प्रणालीभित्र असल शासन कायम गरी आम नागरिकका आकांक्षा सम्बोधन गर्न सबै सुसंस्कृत एवं परिवर्तन कामी राजनीतिक शक्तिहरूबीच सहकार्य गर्दै नयाँ राजनीतिक शक्तिलाई स्थापित गर्न अपरिहार्य रहेको तथ्यलाई आत्मसात् गर्दै, २०८२ साल भदौ २३ र २४ को जेन-जी आन्दोलन लगायत विभिन्न कालखण्डमा भएका जनआन्दोलनहरूका शहीद एवं घाइतेहरूको बलिदानलाई प्रेरणादायी स्मृतिमा राख्दै, समान अठोट बोकेका शक्तिहरूको सहकार्य मार्फत राष्ट्र सेवाको साझा लक्ष्य हासिल गर्न राष्ट्रिय स्वतन्त्र पार्टी (पहिलो पक्ष) र उज्यालो नेपाल पार्टी (दोस्रो पक्ष) बीच देहायका सहमति भएको छ।

१. नवयुवाहरू (Gen-Z) ले भ्रष्टाचार र सुशासन विरुद्ध गरेको आन्दोलनको मर्मलाई आत्मसात् गर्दै घाइते तथा शहीद परिवारका मागहरूको यथोचित सम्बोधन गर्ने प्रतिबद्धता जनाउने,

२. उज्यालो र आत्मनिर्भर अर्थतन्त्र, डेलिभरीमा आधारित राजनीति, योग्यताप्रणाली (Meritocracy) को स्थापना, भ्रष्टाचार शून्य सहनशीलता र सुशासन प्रति प्रतिबद्ध रहँदै, समुन्नति र सामाजिक न्यायका राष्ट्रिय उद्देश्यहरूका लागि गरिनु पर्ने गहिरा नीतिगत, संस्थागत एवं संरचनात्मक सुधारहरू मार्फत आर्थिक-सामाजिक उन्नयन र सुसंस्कृत राजनीतिक अभ्यासको जगमा अर्को दश वर्षभित्र नेपाललाई सम्मानजनक मध्यम-आय भएको राष्ट्र बनाउने मार्गचित्रको इमानदार कार्यान्वयनप्रति समर्पित हुने,

३. पहिलो पक्ष र दोस्रो पक्षबिच एकता भए पश्चात् स्थापित हुने राजनीतिक दलको नाम “राष्ट्रिय स्वतन्त्र पार्टी”, दलको झण्डा साबिककै निलो पृष्ठभूमिको मध्य भागमा सेतो रङ्गको गोलाकार बिचमा निलो रङ्गको घण्टीको आकृति, दलको चुनाव चिन्ह ‘घण्टी’ र केन्द्रीय कार्यालय काठमाडौं उपत्यकामा रहने,

४. राष्ट्रिय स्वतन्त्र पार्टीको केन्द्रीय सभापति रवि लामिछाने रहने र उपसभापतिमा कुलमान घिसिङ, डी पी अर्याल, र स्वर्णिम वाग्ले रहने,

५. उज्यालो नेपालको अभियानलाई अपनत्व लिई राष्ट्रिय स्वतन्त्र पार्टीको कार्यक्रमहरू सँग जोड्दै, एकता पश्चात् पार्टीको संगठनात्मक संरचनालाई थप सक्षम र फराकिलो बनाउन उज्यालो नेपाल पार्टीमा आबद्ध युवा अभियन्ता एवं अनुभवी विज्ञहरूलाई समुचित समायोजन गर्दै जिम्मेवारी तोक्दा योग्यता, समावेशिता र सार्वजनिक छविलाई आधार मान्ने,

६. यस सम्झौता बमोजिम राष्ट्रिय स्वतन्त्र पार्टी सम्बन्धी दस्तावेज निर्वाचन आयोगमा अद्यावधिक गर्ने,

७. राष्ट्रिय स्वतन्त्र पार्टीको सिद्धान्त, नेतृत्व र चुनाव चिन्ह ‘घण्टी’ मा गोलबद्ध भई लोकतान्त्रिक सुशासन, समुन्नति र सामाजिक न्यायका मुद्दा अघि बढाउन अन्य सुसंस्कृत एवं परिवर्तन कामी वैकल्पिक राजनीतिक शक्ति, समूह र व्यक्तिहरूलाई आव्हान गर्ने।

(हस्ताक्षरहरु)

रवि लामिछाने सभापति

अनुपकुमार उपाध्याय अध्यक्ष

बालेन शाह साक्षी