लोकगायक अर्जुन सापकोटाको ‘झलिको’ गीत तीन सातामै करोड क्लबमा

काठमाडौं । लोकगायक अर्जुन सापकोटाको ताजा गीत ‘झलिको’ छोटो समयमा नै युट्युबमा करोड क्लबमा प्रवेश गरेको छ। सार्वजनिक भएको १९ दिनमै यस गीतले एक करोडभन्दा बढी भ्यु प्राप्त गर्दै चर्चा कमाउन सफल भएको हो।

अर्जुन सापकोटा, मेलिना राई र समीक्षा अधिकारीको आवाज रहेको ‘झलिको’ ले प्रकाशनपछि लगातार टिकटकदेखि अन्य सामाजिक सञ्जालसम्म अत्यधिक चर्चा पाएको थियो। यसले गीतलाई छोटो समयमै करोड यात्रा पार गर्न सहज बनाएको गायक सापकोटाले बताए। उनका अनुसार यस गीतबाट आफूले नसोचेको सफलता र दर्शकको विशेष प्रतिक्रिया पाएका छन्।

गीतका शब्द सन्तोष सापकोटाले लेखेका हुन् भने संगीत स्वयं अर्जुन सापकोटाकै रहेको छ। एचबीएन किस्मतको संगीत संयोजनमा तयार भएको गीतमा प्रदीप रोदनको कविता वाचन समावेश गरिएको छ। गीतले प्रेमी–प्रेमिकाबीचको भावना तथा माया–सम्बन्धलाई अभिव्यक्त गर्छ। यद्यपि गीतको भिडिओले वैदेशिक रोजगारीमा जाने युवाहरूको कथा प्रस्तुत गर्छ।

भिडिओमा अर्जुन सापकोटा र कुसुम भण्डारीको अभिनय तथा नृत्य रहेको छ। साथमा शिवु पाण्डे, राजेन्द्र अर्याल, सन्तोष सापकोटा लगायत कलाकारहरूको समेत सहभागिता छ। कास्कीको घान्द्रुकमा छायांकन गरिएको भिडिओको कथा दीपा सिंखडा र विशाल घिमिरेले तयार पारेका हुन्। निर्देशन विशाल घिमिरेकै रहेको भिडिओमा मुकेश नेपालीको कोरियोग्राफी, बुद्ध थापाको छायांकन र दिन्शन शाहको सम्पादन रहेको छ।

गायक सापकोटाका यसअघि ‘पछ्यौरी लिसियो’, ‘बस्यौ अलक्कै’, ‘दुःख साट्मला’ लगायतका गीतहरू अत्यधिक चर्चित छन्। ‘झलिको’ ले यी गीतहरूलाई पछ्याउँदै थप दर्शकको मन जितिरहेको छ।