ब्याट्रीमा समस्या देखिएपछि बीवाईडीले बजारबाट ८८ हजारभन्दा बढी गाडी फिर्ता लिने

एजेन्सी । चिनियाँ सवारीसाधन निर्माता कम्पनी बीवाईडीले ब्याट्रीको सुरक्षा सम्बन्धी समस्या देखिएपछि बजारबाट ८८ हजार ९ सय ८१ वटा प्लग-इन हाइब्रिड गाडीहरू तत्कालै फिर्ता लिने भएको छ ।

चीनको नियामक संस्थाले शुक्रबार निर्देशन दिएपछि गाडी फिर्ता लिन लागिएको हो । छिन प्लस डीएम-आई मोडलका गाडीहरू सन् २०२१ को जनवरीदेखि सन् २०२३ को सेप्टेम्बर महिनाको बीचमा बनेका हुन् ।

ती गाडीहरूको उत्पादन प्रक्रियाका क्रममा पावर ब्याट्री प्याकमा समस्या देखिएपछि पावर आउटपुटमा कमी हुन सक्ने बताइएको छ।

समस्या बल्झिएमा ती गाडीहरूलाई पूर्णविद्युतीय मोडमा चलाउन नसकिने नियामक संस्थाको भनाइ छ । नियामकले गाडीमा भएका समस्याहरूको छानबिनपछि बजारबाट फिर्ता लिनका लागि बीवाईडीलाई निर्देशन दिएको हो ।

बीवाईडीको बिक्री र नाफामा कमी आइरहेको बेलामा यही वर्षमात्र उसले २ लाख १० हजार गाडीहरू बजारबाट फिर्ता लिनुपरेको छ। तीमध्ये करिब ७ हजार प्लग-इन अफरोड एसयूभी हुन् ।

गत अक्टोबर महिनाको मध्यतिर बीवाईडीले सन् २०१५ देखि २०२२ को बीचमा उत्पादन भएका १ लाख १५ हजारभन्दा बढी ताङ र युआन प्रो गाडीहरू बजारबाट फिर्ता लिने घोषणा गरेको थियो । डिजाइनमा समस्या र ब्याट्रीको सुरक्षामा जोखिम देखिएपछि गाडीहरू फिर्ता लिइएको थियो ।

अक्टोबर महिनामा बीवाईडीको बिक्री एक वर्षअघि यही समयमा भएको बिक्रीको तुलनामा १२ प्रतिशतले घटेको थियो । उसको तेस्रो त्रैमासको नाफामा पनि ३३ प्रतिशतको कमी आएको थियो ।

सन् २०२४ को सेप्टेम्बर महिनामा बीवाईडीले लगभग ९७ हजार डल्फिन र युआन प्लस ईभी फिर्ता लिएको थियो । ती गाडीहरूको स्टियरिङ कन्ट्रोल युनिटमा देखिएको समस्याले आगलागीको जोखिम बढाउने देखिएपछि गाडी फिर्ता लिइएको हो।