छुर्पी निर्यात बढ्दै, पाँच वर्षमा ४ अर्बभन्दा बढी आम्दानी

काठमाडौँ । पछिल्लो समय नेपालबाट छुर्पीको निर्यात तीव्र रूपमा बढ्दै गएको भन्सार विभागले जनाएको छ। नेपालमा उत्पादित छुर्पी अहिले अमेरिका, क्यानडा, बेलायत, जापान, दक्षिण कोरिया सहित २७ देशमा निर्यात भइरहेको छ। विभागका तथ्यांकअनुसार विगत पाँच वर्षमा नेपालले ४ अर्ब ८५ करोड रुपैयाँभन्दा बढीको छुर्पी विदेश पठाएको छ।

चालु आर्थिक वर्षका चार महिनामै (साउन–कात्तिक) १ अर्ब ३ करोड रुपैयाँ बराबरको ८ लाख ६७ हजार किलो छुर्पी निर्यात भएको छ। कुकुर र विरालोको खानाका रूपमा विदेशमा लोकप्रिय छुर्पीमध्ये अमेरिका प्रमुख बजार बनेको छ। चार महिनामा मात्र अमेरिका एक्लैले ८६ करोड रुपैयाँ बराबरको ४ लाख ९४ हजार किलो छुर्पी आयात गरेको छ, जसले कुल निर्यातको ८३ प्रतिशत हिस्सा ओगटेको छ।

त्यसपछि क्यानडाले ७ करोड ८९ लाख रुपैयाँको २ लाख ३ हजार किलो र बेलायतले ३ करोड ९८ लाख रुपैयाँको ३७ हजार किलो छुर्पी भित्र्याएको विभागले जनाएको छ। जापान, दक्षिण कोरिया, यूएई, हङकङ, मलेसिया, न्यूजिल्याण्ड, नेदरल्याण्ड, ग्रीस र ब्राजिललगायत देशमा पनि निर्यात भएको छ। सबैभन्दा कम निर्यात म्यानमारमा ६ हजार रुपैयाँ बराबरको ९ किलो मात्र रहेको छ।

छुर्पी निर्यातसँगै आयात पनि भइरहेको विभागको तथ्यांकले देखाएको छ। पाँच वर्षमा नेपालले २५ करोड रुपैयाँ बराबरको छुर्पी आयात गरेको छ। चालु आवको चार महिनामा ६ करोड ७९ लाख रुपैयाँ बराबरको २ लाख १४ हजार किलो छुर्पी आयात भएको छ।

भन्सार विभागका अनुसार निर्यात र आयात दुवै बढ्दै गएको देखिए पनि छुर्पी निर्यातले नेपाललाई पछिल्ला वर्षमा महत्वपूर्ण आम्दानी दिलाउँदै आएको छ।