‘अभिमन्यु: च्याप्टर १’ को हिन्दी भर्सनको टिजर सार्वजनिक

काठमाडौं । मंसिर १८ गते रिलिज हुने नेपाली फिल्म ‘अभिमन्यु : च्याप्टर १’को हिन्दी भर्सन टिजर सार्वजनिक भएको छ। निर्माणपक्षले हिन्दी भाषी दर्शकलाई लक्ष्य गर्दै टिजर बाहिर ल्याएको हो।

नेपाली र हिन्दी दुवै भाषामा तयार गरिएको यो फिल्म नेपाल, भारतसहित विश्वव्यापी रूपमा एकैसाथ प्रदर्शनमा आउने तयारीमा छ। भारत तथा ओभरसिज मार्केटमा पहुँच मजबुत बनाउन निर्माण टोलीले हिन्दी टिजर सार्वजनिक गरेको जनाएको छ।

सार्वजनिक टिजरमा प्रमुख कलाकारहरूको दमदार उपस्थिति देखाइएको छ। प्रेम, सस्पेन्स, पैसाको लोभ, अपहरण, सेयर विवाद, प्रहरी कस्टडीमा पुगेको आरोपी र उसका बयानजस्ता कथावस्तु झल्किने गरी टिजर काटिएको छ। फिल्मले मुख्य पात्र कसरी अपहरणकारी बन्न पुग्छ भन्ने सस्पेन्सपूर्ण कथा बोकेको संकेत टिजरमा पाइन्छ।

सेभेन सिज सिनेमाको प्रस्तुति रहेको चलचित्रमा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल र शिशिर वाङ्देल मुख्य भूमिकामा छन्। सुशान्त गौतमको निर्देशनमा बनेको फिल्ममा मदन थापा क्रिएटिभ निर्देशक र मुकेश खनाल लेखक रहेका छन्।

‘अभिमन्यु : च्याप्टर १’ का निर्माता विनोद पौडेल र गुञ्जन गिरी हुन्। सह–निर्मातामा रमेश चौलागाईं र हरि श्रेष्ठ छन् भने कार्यकारी निर्माता विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन्। लाइन प्रोड्युसर जीवन शाक्य हुन्।

फिल्ममा शरद महतोको सिनेमाटोग्राफी, मनोज श्रेष्ठको भिएफएक्स, जुनिम गहतराजको कलर ग्रेडिङ र मदन घिमिरेको सम्पादन रहेको छ।