देशको समृद्धिका लागि भौतिक विकास मात्र पर्याप्त होइन : राष्ट्रपति पौडेल  

काठमाडौं । राष्ट्रपति रामचन्द्र पौडेलले मुलुकको समृद्धिका लागि भौतिक विकाससँगै साहित्य, कला, सङ्गीत र संस्कृति क्षेत्रको उतिकै महत्त्व रहेको बताएका छन्।

नेपाल प्रज्ञा प्रतिष्ठानद्वारा आयोजित राष्ट्रिय कविता महोत्सव–२०८२ मा विजयी कविहरूलाई सम्मान गर्दै उनले नेपाल विविध भाषा, जाति र संस्कृतिहरूको साझा थलो भएको उल्लेख गरे।

‘साहित्य र समाज एक अर्काका पूरक हुन्,’ भन्दै राष्ट्रपति पौडेलले भाषा, साहित्य र संस्कृतिको संरक्षण–संवर्धन सबैको साझा दायित्व भएको बताए। उनले प्राज्ञिक क्षेत्रमा क्रियाशील प्रतिभाको कदर र सम्मान गर्दै सरकारले पनि भाषा–साहित्यको विकासलाई प्राथमिकता दिनुपर्नेमा जोड दिए।

राष्ट्रपतिले उत्कृष्ट दस भित्र पर्न सफल कविहरूलाई बधाई दिंदै सृजनात्मक यात्राको प्रगतिका लागि शुभकामना व्यक्त गरे।