मुस्ताङमा ‘टप अफ द वर्ल्ड गल्फ’ हुने

काठमाडौं । मुस्ताङको लोमान्थाङस्थित ४,७०० मिटर उचाइको गल्फ कोर्सलाई ‘गिनिज बुक अफ वर्ल्ड रेकर्ड’मा दर्ता गर्ने अभियानसहित ‘टप अफ द वर्ल्ड गल्फ क्लासिक’को चौथो संस्करण आगामी भदौ २८ र २९ गते हुने भएको छ।

आयोजक ‘मुस्ताङ गल्फ कोर्स’का अनुसार प्रतियोगितामा नेपालसहित विभिन्न देशका करिब ६० जना गल्फर सहभागी हुनेछन्। यसपटक पहिलोपटक १८ होलको खेल सञ्चालन हुनेछ।

विजेताले क्रमशः ३० हजार, २० हजार र १० हजार रुपैयाँ पुरस्कार पाउनेछन् भने होल–इन–वानका लागि विशेष आकर्षणस्वरूप घोडा पुरस्कार राखिएको छ।