एचएलआई लार्ज क्याप फण्ड आजदेखि सर्वसाधारणका लागि बिक्री खुला

काठमाडौं । हिमालयन लाइफ इन्स्योरेन्स म्युचुअल फण्ड अन्तर्गत सञ्चालन हुने एचएलआई लार्ज क्याप फण्ड आज (भदौ १५ गते) देखि सर्वसाधारणका लागि निष्काशन तथा बिक्री खुला भएको छ।

यो फण्डलाई हिमालयन लाइफ इन्स्योरेन्सको सहायक कम्पनी हिमालयन इन्भेष्टमेन्ट बैंकर लिमिटेडले पहिलोपटक बजारमा ल्याएको हो। कुल ४ अर्ब रुपैयाँ बराबरको ४० करोड इकाईमध्ये २० करोड इकाई (२ अर्ब रुपैयाँ बराबर) प्रवर्द्धक कम्पनीका लागि सुरक्षित गरिएको छ भने बाँकी २० करोड इकाई सर्वसाधारणका लागि उपलब्ध गराइएको छ।

प्रतिइकाई अंकित मूल्य १० रुपैयाँ निर्धारण गरिएको यस फण्डमा लगानीकर्ताले न्यूनतम १०० इकाईदेखि अधिकतम ४ करोड इकाईसम्म आवेदन दिन सक्नेछन्।

आवेदन दिने अन्तिम मिति भदौ १८ गतेसम्म तोकिएको भए पनि सो अवधिभित्र मागअनुसारको आवेदन नआएमा भदौ २९ गतेसम्म अवधि थप गर्न सकिने व्यवस्था गरिएको छ। इकाई बाँडफाँड भएको मितिबाट १० वर्षका लागि बन्दमुखि रहने यस फण्डमा कम्तीमा ५० प्रतिशत इकाईमा आवेदन प्राप्त भएमा मात्र बाँडफाँड हुनेछ, नभएमा योजना खारेज गरी १५ दिनभित्र रकम फिर्ता गरिनेछ। इन्फोमेरिक्स क्रेडिट रेटिङ्ग नेपालले यस फण्डलाई आईआरएन ए प्लस र आईआरएन एएमसी क्वालिटी ३ रेटिङ्ग प्रदान गरेको छ भने यसको निष्काशन तथा बिक्री प्रबन्धक हिमालयन इन्भेष्टमेन्ट बैंकर लिमिटेड नै रहेको छ।

लगानीकर्ताले नेपाल धितोपत्र बोर्डबाट अनुमति प्राप्त आश्वा सेवामा सहभागी बैंक तथा वित्तीय संस्था, तिनका शाखा कार्यालयहरू वा सिडिएस एण्ड क्लियरिङ्ग लिमिटेडको मेरो शेयर अनलाइन प्रणालीमार्फत आवेदन दिन सक्नेछन्।