पिपुल्स पावरका अवितरित हकप्रद शेयर लिलामीमार्फत बिक्री खुला

काठमाडौं । पिपुल्स पावर लिमिटेडले आफ्ना अवितरित हकप्रद शेयर आज (भदौ १५ गते) देखि लिलामी प्रक्रियामार्फत बिक्री खुला गरेको छ। कम्पनीले यसअघि असार २२ गतेदेखि साउन २६ गतेसम्म हकप्रद शेयर बिक्रीका लागि अवसर दिएको थियो। तर तोकिएको अवधिभित्र बिक्री नभएका ३ लाख ९१ हजार ७७९ कित्ता शेयर अहिले लिलामीमार्फत बजारमा ल्याइएको हो।

यस लिलामीमा कम्पनीका पुराना सेयरधनी मात्र नभई इच्छुक जो–कोही व्यक्ति वा संस्थाले पनि भाग लिन सक्नेछन्। यसले व्यापक लगानीकर्तालाई सहभागी हुने अवसर दिने कम्पनीको भनाइ छ।

लिलामीमा राखिएका शेयरको आधार मूल्य प्रतिकित्ता १०० रुपैयाँ तोकिएको छ। आवेदकले यसभन्दा बढी मूल्यमा पनि बोलकबोल गर्न सक्नेछन्। लगानीकर्ताले न्यूनतम १०० कित्ताका लागि आवेदन दिनुपर्नेछ भने अधिकतम संख्यामा कुनै सीमा नराखिएको कम्पनीले जनाएको छ।

शेयर खरिदका लागि इच्छुकले आफ्नो बोलपत्र भदौ २२ गतेसम्म पेस गर्नुपर्नेछ। बोलपत्र पेस गर्ने व्यवस्था प्रभु क्यापिटल लिमिटेड, कमलादी काठमाडौंमा गरिएको छ। साथै, आवेदन प्रभु बैंकका विभिन्न शाखा कार्यालयहरू—विराटनगर, वीरगन्ज, हेटौँडा, पोखरा, बुटवल, सुर्खेत र धनगढी—बाट पनि दिन सकिनेछ।