दशैँका लागि नयाँ नोट सटही भदौ २९ गतेदेखि

काठमाडौँ । नेपाल राष्ट्र बैंकले दसैँ, तिहारलगायत चाडबाडलाई लक्षित गरी यही भदौ २९ गतेदेखि नयाँ नोट सटही सुविधा दिने भएको छ। राष्ट्र बैंकले आज सूचना जारी गर्दै देशभरका विभिन्न स्थानमा नयाँ नोट वितरण हुने जानकारी दिएको हो।

सुकिला नोट सटही राष्ट्र बैंकको थापाथलीस्थित मुद्रा व्यवस्थापन विभागसहित विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीस्थित प्रादेशिक कार्यालयहरूबाट प्राप्त गर्न सकिनेछ।

त्यस्तै, राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थाका शाखा कार्यालयहरूबाट पनि सर्वसाधारण र अन्य वित्तीय संस्थाहरूले नयाँ नोट सटही गर्न सक्नेछन्।

राष्ट्र बैंकले दसैंलाई लक्षित गर्दै सटही कार्य प्रभावकारी र सुव्यवस्थित बनाउन सबै शाखालाई आवश्यक व्यवस्था गर्न निर्देशनसमेत दिएको छ।