एएफसी यु–२३ एशियन कपमा छनोट हुने लक्ष्य छ : नेपाली टोली

काठमाडौँ। नेपाली यु–२३ युवा टोलीले ताजिकिस्तानमा हुने एएफसी यु–२३ एसियन कप क्वालिफिकेसनमा छनोट हुने लक्ष्यका साथ उत्रने बताएको छ।

नेपाली युवा टोलीले आगामी सेप्टेम्बर ३ देखि हुने यु–२३ एसियन कप क्वालिफिकेसनमा समूह ‘के’ बाट चुनौती प्रस्तुत गर्दै छ। नेपाली युवा टोलीका प्रशिक्षक नवीन न्यौपानेले तयारी गर्न पर्याप्त समय पाएको र प्रशिक्षण पनि प्रभावकारी भएकाले छनोट हुने लक्ष्य रहेको आशा व्यक्त गरेका छन्।

प्रशिक्षक न्यौपानले करिब दुई महिनादेखि तयारी गर्ने समयमा पाएको उल्लेख गर्दै यसबीचमा आफूले इन्डुरेन्समा ध्यान दिएको बताए। सिनियर राष्ट्रिय टोलीबाटै खेलिसकेका चारजना र विभिन्न उमेर समूहबाट खेलका उत्कृष्ट खेलाडी यु–२३ को टोलीमा रहेकाले उत्कृष्ट नतिजा आउनेमा उनी आशावादी छन्।

उनले आफूसँग केही अनुभवी खेलाडी पनि रहेको र तयारी राम्रो हुँदा देशलाई सकारात्मक नतिजा दिनेमा आफू विश्वस्त रहेको बताएका छन्। उनले यसै छनोटका लागि सिनियर टोलीसँग मैत्रीपूर्ण खेल खेलेको र त्यस खेलका क्रममा सुखद संकेत देखिएको बताए। आफ्नै प्रशिक्षणमा सिनियर टोलीलाई ताजिकिस्तानमा खेलिसकेकाले त्यहाँको वातावरणबारे आफूसँग अनुभव पनि रहेको उनी बताउँछन्।

प्रशिक्षण अवधिमा उत्कृष्ट प्रदर्शन गरेका खेलाडीलाई टोलीमा समावेश गरिएको उनले स्पष्ट पारे। कुनै एक खेलाडीले छनोट सही तरिकाले नभएको भन्ने आरोपबारे प्रशिक्षक न्यौपानेले त्यसमा कुनै सत्यता नरहेको स्पष्ट पारे।

उनले आरोप लगाउने खेलाडीमा पनि क्षमता रहेको तर छनोटमा उत्कृष्ट दिन खेलाडीलाई टोलीमा समावेश गरिएको उल्लेख गरेका छन्। आयोजकसहित सिरिया र फिलिपिन्स रहेको यस समूहको शीर्ष स्थानमा रहँदै नेपाली टोलीले छनोट हुने लक्ष्य राखेको छ। कप्तान आयुष घलानले पनि सन्तुलित टोली बनेकाले छनोट हुने लक्ष्यसहित खेल्ने विश्वास व्यक्त गरेका छन्। प्रशिक्षकको योजना र ट्याक्टिसअनुसार आफूहरूले खेल्ने उनी बताउँछन्।

यस छनोटबाट १६ राष्ट्रले सन् २०२६ को जनवरी ७ देखि २५ सम्म साउदी अरेबियामा हुने एएफसी यु–२३ एसियन कपमा स्थान बनाउनेछन्। नेपालको समूहमा सबै बलिया राष्ट्र हुन्। फिफा वरीयतामा धेरै माथिका राष्ट्र रहेको समूहमा नेपालले छनोट हुने लक्ष्य राखेको छ।

प्रशिक्षक न्यौपानेले दुई महिनाअघि ८९ जनाको प्रारम्भिक टोलीबाट २३ सदस्यीय नेपाली टोली घोषणा गरेका हुन्। अखिल नेपाल फुटबल संघ (एन्फा)का अध्यक्ष पंकजविक्रम नेम्बाङ, महासचिव किरण राई र प्रवक्ता सुरेश शाहलगायतले नेपाली टोलीलाई बिदाइ गरेका थिए। नेपाली टोली आइतबार ताजिकिस्तान प्रस्थान गर्नेछ।

नेपालले आगामी सेप्टेम्बर ३ मा ताजिकिस्तानसँग खेल्दै छनोट यात्रा थाल्नेछ। त्यसपछि सबैभन्दा बलियो टोली सिरियासँग सेप्टेम्बर ६ र तेस्रो खेल फिलिपिन्ससँग सेप्टेम्बर ९ तारिखमा खेल्नेछ। हरेक ११ वटा समूहका विजेता र उत्कृष्ट चार उपविजेताले यु–२३ एसियन कपमा स्थान बनाउनेछ।

एन्फाका महासचिव किरण राईले खेलमा पछि परेको स्थितिमा पनि सन्तुलन नगुमाई धैर्यका साथ खेल्न अनुरोध गरे। उनले पुस ९ गतेदेखि सुरु हुने सहिद स्मारक ‘ए’ डिभिजन लिगको तयारी पनि भइरहेको बताए।