एससीओ सम्मेलनमा मोदी–सी भेटवार्ता हुँदै, ओलीले लिपुलेक विषयमा उठाए आपत्ति

काठमाडौं । चीनको तियानजिन सहरमा आयोजना हुने सांघाई सहयोग संगठन (एससीओ) शिखर सम्मेलनको अवसरमा भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबीच आज भेटवार्ता हुने भएको छ।

यसअघि नेपाली प्रधानमन्त्री केपी शर्मा ओलीले शनिबार राष्ट्रपति सीसँगको भेटमा लिपुलेक विषयमा आपत्ति जनाउँदै नेपाली भूमि प्रयोग गरी चीन–भारतबीच व्यापारिक मार्ग खोल्ने सहमति स्वीकार्य नहुने बताएका थिए।

मोदीले सन् २०१८ मा चीन भ्रमण गरेयता पहिलोपटक गलवान झडपपछि राष्ट्रपति सीसँग प्रत्यक्ष भेट गर्न लागेका हुन्। दुई देशबीचको सीमा विवाद समाधान प्रयासस्वरूप यो भेटलाई विशेष महत्त्वका साथ हेरिएको छ।

एससीओ शिखर सम्मेलनमा नेपाल, भारत, चीनसहित २० भन्दा बढी देशका नेताहरूको सहभागिता रहनेछ। सम्मेलनको मूल उद्देश्य क्षेत्रीय सहकार्य, सुरक्षामूलक समन्वय र कूटनीतिक संवाद विस्तार गर्नु रहेको छ।