अमेरिकाको नयाँ सर्तले जापानसँगको व्यापार वार्ता अवरुद्ध

काठमाडौं । अमेरिकाको नयाँ चामल खरिद सम्बन्धी मागका कारण अमेरिका र जापानबीचको सम्भावित व्यापार सम्झौता अवरुद्ध भएको छ। जापानी पक्षले उक्त सर्त अस्वीकार गरेपछि वार्ता स्थगित भएको हो।

जापानी आर्थिक पत्रिका निक्केई का अनुसार, टोकियोका शीर्ष व्यापार वार्ताकारले आफ्नो हालैको अमेरिकी भ्रमण रद्द गरेका छन्, जसले दुई पक्षबीचको व्यापारिक गतिरोध गहिरिएको संकेत गर्छ।

यसअघि जुलाईमा दुई देशबीच सम्झौता भएको थियो, जसअनुसार जापानी सामानमा लाग्ने अमेरिकी कर १५ प्रतिशतमा झारिएको थियो। तर, अमेरिकी राष्ट्रपति डोनाल्ड ट्रम्पले राखेको नयाँ सर्तले सो समझदारीको भावना विपरित रहेको निक्केईले उल्लेख गरेको छ।