लुम्बिनी प्रदेशसभा सदस्य सरिता पुनको निधन

काठमाडौं । लुम्बिनी प्रदेशसभा सदस्य सरिता पुनको शनिबार काठमाडौंस्थित त्रिवि शिक्षण अस्पताल, मनमोहन सेन्टरमा उपचारका क्रममा निधन भएको छ।

पूर्वी रुकुमकी निवासी पुनको केही दिनअघि जटिल स्वास्थ्य समस्या देखिएपछि काठमाडौं ल्याइएको थियो। शल्यक्रियामार्फत छोरीलाई जन्म दिएपछि दोस्रोपटक मुटुमा कृत्रिम भल्भ प्रत्यारोपण गरिएको थियो। तर, उपचार सफल हुन नसक्दा उनको निधन भएको एमाले पोलिटब्यूरो सदस्य खेममान खड्काले जानकारी दिए।

पुन नेकपा (एमाले) बाट समानुपातिक प्रणालीअन्तर्गत लुम्बिनी प्रदेशसभामा निर्वाचित भएकी थिइन्। उनी प्रदेशसभाको अर्थ, पर्यटन तथा विकास समितिको सदस्य पनि थिइन्।

उनी नेतृत्वदायी भूमिकामा सक्रिय युवा महिला नेतृको रूपमा चिनिन्थिन्। पुनको असामयिक निधनप्रति विभिन्न राजनीतिक दल, संघसंस्थाले दुःख व्यक्त गरेका छन्।