मनाङ ‘ख’ मा कात्तिक १७ गते उपनिर्वाचन हुने

काठमाडौं। निर्वाचन आयोगले मनाङ ‘ख’मा १७ कात्तिकमा उपनिर्वाचन गर्ने निर्णय गरेको छ। दीपक मनाङे भनिने राजिव गुरुङ अदालतबाट फौजदारी मुद्दामा दोषी ठहर भएपछि सो स्थान रिक्त भएको थियो।

आयोगले सर्वोच्च अदालतको फैसलाअनुसार मनाङ ‘ख’ रिक्त भएको जनाएको छ। ‘राजीव गुरुङको नेपालको संविधानको धारा १७८ (१) (ङ) बमोजिम तोकिएको योग्यता नभएको तथा प्रदेश सभा सदस्य निर्वाचन ऐन, २०७४ को दफा १३ को खण्ड (छ) बमोजिम सजाय भुक्तान गरेको मिति ६ वर्ष नभएसम्म उम्मेदवार हुन अयोग्य हुने ठहर भएको तथा सोही ऐनको दफा १६ बमोजिम आफ्नो पदबाट मुक्त हुने र नेपालको संविधानको धारा १७८ बमोजिम योग्यता नभएका निज प्रत्यर्थीको स्थान संविधान धारा १८० को खण्ड (ख) बमोजिम रिक्त हुने देखियो’, आयोगको विज्ञप्तिमा भनिएको छ।

प्रतिनिधि सभा तथा प्रदेश सभाको कुनै पनि स्थान रिक्त भएका सोही निर्वाचन प्रणालीअनुसार ६ महिनाभित्र निर्वाचित गर्नुपर्ने कानूनी व्यवस्था छ। आयोगले भदौ २५ गते सार्वजनिक गर्ने मतदाता सूचीलाई उपनिर्वाचनको अन्तिम नामावलीका रूपमा प्रयोग गर्ने जनाएको छ।

रूपन्देही- ३ मा पनि १७ कातिकमै उपनिर्वाचन हुँदैछ।