यमनका विद्रोही प्रधानमन्त्री इजरायली हवाई हमलामा मारिएको पुष्टि

काठमाडौं । इजरायली हवाई हमलामा यमनस्थित इरान समर्थित हूथी विद्रोही सरकारका प्रधानमन्त्री अहमद गलेब नासिर अल-राहावीको मृत्यु भएको पुष्टि भएको छ।

हूथी समूहका अनुसार बिहीबार यमनको राजधानी सानामा इजरायल डिफेन्स फोर्सेस (IDF) ले गरेको हवाई आक्रमणमा राहावीको निधन हुनुका साथै परराष्ट्र, न्याय, युवा तथा खेलकुद, सामाजिक मामिला र श्रम मन्त्रीहरू पनि मारिएको साउदी समाचार संस्था अल-हदथ ले जनाएको छ।

उक्त हमलामा केही वरिष्ठ हूथी अधिकारीहरू घाइते भएका छन् भने समूहका उपप्रधानमन्त्री मोहम्मद अहमद मिफताहले नयाँ प्रधानमन्त्रीको जिम्मेवारी लिने जनाइएको छ।

सन् २०२४ को अगस्टदेखि प्रधानमन्त्री रहेका राहावी विद्रोही सरकारमा मुख्य निर्णयकर्ता नभए पनि प्रतीकात्मक नेतृत्वको भूमिकामा सक्रिय थिए। हमलामा हूथी सर्वोच्च नेता अब्दुल-मालिक अल-हुथी, रक्षा मन्त्री र सेनाध्यक्ष भने जोगिएको बताइएको छ।

गाजा युद्ध सुरु भएयता, हूथी विद्रोहीहरूले इजरायलमाथि क्षेप्यास्त्र आक्रमण गर्नुका साथै रेड सी र एडेनको गल्फ क्षेत्रमा व्यावसायिक जहाजहरूलाई निशाना बनाउँदै आएका छन्। यस घटनाले इजरायल–हूथी द्वन्द्व थप चर्किने संकेत देखिएको छ।