‘मिस नेपाल वर्ल्ड २०२५’ को उपाधि लुना लुइँटेललाई

ललितपुर। लुना लुँइटेलले ‘मिस नेपाल वर्ल्ड २०२५’ को उपाधि जितेकी छन्। शनिबार गोदावरीस्थित सनराइज हलमा सम्पन्न भव्य फिनालेमा गत वर्षकी विजेता आस्माकुमारी केसीले उनलाई ताज हस्तान्तरण गरिन्।

त्यसैगरी, सोनी घले ‘मिस नेपाल अर्थ’ र उरुषा भण्डारी ‘मिस नेपाल इन्टरनेसनल’ को उपाधिमा विजयी बने। यस वर्षदेखि सुरु गरिएको नयाँ विधा ‘मिस कोस्मो’ मा दीपशिखा नेपालले उपाधि जितिन्।

प्रतियोगितामा देशभरबाट अडिसनमार्फत छनोट भएका २६ जना प्रतिस्पर्धीले सौन्दर्य, प्रतिभा, बौद्धिक क्षमता र व्यक्तित्वका विभिन्न चरण पार गर्दै फिनालेसम्म यात्रा तय गरेका थिए।

उपाधि जितेकी लुँइटेलले अब सामाजिक अभियानहरूमा संलग्न हुँदै अन्तर्राष्ट्रिय सौन्दर्य प्रतियोगितामा नेपाललाई प्रतिनिधित्व गर्नेछिन्। प्रतियोगिता हिडन ट्रेजरले आयोजना गरेको हो।